小弟近期對IEM入耳式耳機好有興趣，特別係Sony香港佢地個試聽室唔錯，地點交通方便，小弟都唔客氣，一有時間都會去試聽一下唔同產品。繼Sony Just ear之後，小弟想聽埋Sony IER-M9 及 IER-M7，佢地都係有一定市場代表性產品，加埋自己既IER-Z1R，小弟就有齊試聽Sony出名IEM耳機體驗。
舞台監聽
正式試聽分享之前，先來一章開胃口水文。小弟先去官網索料，摸一摸M9同M7個底，了解一下佢地係咩料。原來佢地都係以舞台監聽做定位，歌者透過舞台監聽耳機，聽到既現場音效，混合咗所有樂器聲音，然後對自己既聲音進行調整，達到平衡重現效果。
M9係M7高階版，前者係一個5路 5 動鐵系統，多咗一個額外高音單元，能夠更圓滑細膩重現高頻，後者係一個 4 路 4 動鐵系統，同樣能夠勝任，特別係對中頻人聲，及其他重要要求。
根據官方既介紹，雖然呢類耳機係用於監聽，但亦適合於聆聽，係一石二鳥咁話！透過舞台監聽耳機，音樂表演，例如流行音樂、搖滾同爵士樂，聽者能夠感受到律動同複雜精細表現，例如餘音同呼吸細節。
簡單講，小弟作為一個聽者，評價佢地既重點，就係還原現場感既能力，能夠捕捉其中氛圍，音樂感，爆發力衝擊感及歌者感性演繹。
務實專業
M9同M7第一印像就咁睇樣，黑色低調簡約無咩花巧，似乎係為揾食打真軍設計，係務實型，有一陣Pro味！如果話 Just ear，Z1R係土豪，玩家同敗家仔級耳機，咁M9同M7就係中產級耳機。
價位方面，其中M9市場價接近7K，M7就比較親民得多，係M9半價唔使4K。其實小弟對M7更有興趣，因為佢同小弟隻Shure SE846係係同一個價位水平，可以作直接比較。至於M9值唔值得係M7既倍價，真係要聽過先知！
試聽分享
正式分享之前，要先出一段圓場文，小弟唔係以專業舞台監聽角度評價M9同M7，與專業要求效果毫無關係！小弟純粹係作為一個普通聆聽者去感受佢地既演繹，並忠於自己既分享，只能作為參考，C兄應該自己耳聽為實！
價位真理
試聽係用黑磚NW-WM1A出4.4推M9及M7。小弟首先做兩者之間對比，好明顯，M9既效果係“全方位”將M7比下去！依小弟既聽感，所有既技術性效果，唔使講嘢M9贏哂，M7效果相對“啞暗”！M9比到一個小弟標準既“欣賞”級別演繹，M7就只能算係基本合格既“舒服”效果！M9完全係另一個階層，難怪價位相對M7有一段明顯距離，的確係無死錯人！
本來小弟對M7係比較有興趣，但係聽過之後，覺得不過如是！一方面，唔係好聽到Sony既獨特音色！另一方面，又唔屬於係直白類型！有些少兩頭唔到岸，唔咸唔淡咁，係定位危機！老實講，就算係出文時，減咗價唔使4K，如果小弟要買新耳機，都係唔會考慮M7！要“均衡直白”，小弟會選SE846，要真正聽到Sony“淳厚”味道，不如忍一陣蓄多些少彈藥直接上M9！M9既效果如何？同Z1R及Sennheiser IE 900對比又如何？
淳厚經典
M9既效果，就係典型Sony果陣食味，有巨大空間感及音場，亦有被包圍置身其中感覺，中低音效果特出而且富有音樂感及分離度，高頻就有些少空洞感。
整體輸出既淨質量理想，不過同Z1R及IE 900 效果比仲有些少距離。係動態，主體塑造，細膩度，層次感方面算係有交代，但未達到Z1R既“超動氣量”及“無限細膩”級數，效果亦係偏向“淳厚”味道，恬味未有充分體現，唔算得上係“淳恬交融”既效果。
試聽小結
M9同黑磚係官方原配，但係好明顯，有效果係Z1R有而M9無，Z1R始終都係名符其實係更高層次既“味王”！如果受唔住Z1R既重大體腔，或出現唔貼耳既配戴及MMCX換線煩惱，鍾意Sony味道既話，就唔好考慮IE 900，M9係唔錯選擇，M9同黑磚一套出文時價位大概係1.4W，都算係物有所值。
沒有留言:
發佈留言