話說小弟昨日收工之後，去咗某相熟店鋪以好價入咗隻 SHURE SE846，跟住就一路戴住聽沿途坐車返屋企 ......
經典之選
繼續之前，先申報利益，小弟其實係唔傾向大投資入去DAP流動系統，IEM耳機，當年佢新出廠時已有留意，的確唔係平，就咁入當年新出既旗艦級入耳機，真係一個冒險！
今時今日2020年，小弟入SE846既情況完全唔同，唔係一個偶然，更加唔係一個冒險，因為佢已經成為經典！經典者，經得起時間考驗歷久不衰，加上個價都有一定回落，小弟覺得合理，就入咗個舊版(無升級藍芽線)，特別選透明殼身呢款。
小弟就係衝住要聽經典的，選擇SE846係好自然，再加上綜合考慮過其他一系列其他因素，例如兼容性、擴展性、通用性等等，同廠新出Aonic系列，Westone及Sennheiser系列，特別係隻IE800S，小弟都有了解過，SE846始終就係小弟一步到位不二之選！
第一感
吹完一輪入手背景，就到大家最想知既部份，小弟對SE846既個人感受。首先，入手SE846一定係無死錯機，問題係值唔值，最重要係咪自己果杯茶！
係出文時，SE846入手未夠兩日，聽咗未夠十個鐘，仲係用部手機(華為Mate 20X)出3.5推，但係上面既憂慮巳經完全可以排除！其他咩開箱呀，配件呀，性能呀，小弟就唔咁例排浪費口水講啦！
SE846第一感，兩句講完。好膠，不過小弟鍾意！平平無奇，所以好出奇！
透視科幻
小弟首先要抽吓自己水，呢個帖仲係火紅火綠，未有退燒跡像。有好多CDROM，其中應該都不乏SE846用家同fans，小弟話SE846初感係“平平無奇”，點解無人即時彈出來批鬥小弟？！為SE846平反？！聰明既C兄一定巳經知道小弟係有修養有內涵，唔可以單用字面了解，肯定後面陸續有下文，所以忍住唔出聲，繼續做住CDROM！
小弟一向都係鍾情金屬質感同光澤，所以對咁膠既SE846，就外相來講，係不能討好小弟。最後選咗透明款，見到裏面電子零件同銀灰色包網線，相對其他色款，無金屬手觸質感都有視像感，睇落仲有幾分數碼世代潮感。咁有內涵既小弟，戴住隻透明SE846出街，膠得來都唔會失禮！
自然柔和
真章來啦！小弟之所以用“平平無奇”來形容初感，係因為搵唔到明顯既技術性問題！根據小弟以往經驗，新機出聲，唔係肥厚油膩，就係冷傲孤骨，唔係墶成一塊，就係肢離斷續，唔係怯場聲緊，就係飄移浮染 ...... 總有比較明顯聽得出唔妥當既地方。你話啦，SE846一出聲就係“無奇”，仲唔係難得！
“平平”又如何？已經比出提示，小弟隻SE846話係全新機，出廠第一響唔係一鳴驚人，而係自然柔和，巳經足夠即時KO玩咗幾年既RHA T20，咁當然，佢地天生就已經唔係同一個檔次！雖然只係用手機3.5直推，完全可以體會到SE846既控制力，四平八穩，音節之間承接自然，微暖聲底，線條柔和，出廠前一定下過唔少功夫做均衡調校，通用性方面非常親民！
小弟品聽SE846時間尚短，暫時未能確切評價細節，例如場感人聲，不過好有期待！簡單概括小結：柔待悠，清待純，和待美！
配戴體驗
小弟要聽多一段時間隻SE846感受佢既變化，呢段期間最好就係繼續灌水，加番寫真清圖，配戴體驗分享同好！
話又說回來，小弟開箱後試戴SE846, 足足搞咗成十幾分鐘分上下左右，耳線轉位及曲度。頭幾次戴因為未熟手，未能單手操作戴耳，入耳角度又唔好，品聽效果大打折扣好唔穩定！
另一方面，戴咗SE846幾次，小弟耳殼已經有些少痺痛，好明顯，原廠SE846體形及設定，未能完全穩定套入小弟耳殼，小弟會嘗試換細一號既海綿或膠塞，希望得到一個好既配戴效果，睇怕就係玩入耳機用家必須經過既一段磨合適應期。
CM誘惑
對於入耳機未能配合個別用家耳殼形態所產生既問題，其實小弟之前都有考慮過CM(定製模殼)耳機，CM而家真係開到成行成市，要幾勁有幾勁，要幾fit有幾fit，要幾形有幾形，包滿意咁話，大前題係銀彈充足，分分鐘就係五位數字先落到樓，隨時走火入魔，血流成河！
小弟差些少就直接上CM，不過理性又再一次將小弟從火坑中抽身出來！要玩CM都唔差在等一等，入咗隻SE846先，煲熟聽完原裝經典之後，再換CM殼！況且，SE846改CM大把先例，一定無死錯殼！就係咁，理性天使戰勝咗猴急魔鬼!
無線世代
當今係網絡世紀之中既無線世代，睇片打機由以前獨立落地大機大電視，去到連網桌面系統，到而家無線流動手機，功能越來越強勁，根本巳經變成一個個人流動多媒體平台，小弟就見證咗歷史性既科技進步。
無線連接的確係帶來極大方便，不過對主要品聽音樂小弟來講，呢套SE846無BT線比較合適。小弟用手機聽歌前，必定反射式先轉到飛行模式，數據語音，WIFI，BT，NFC所有無線連接通通關閉，六親斷盡，然後先播歌慢慢聽！雖然潮流興無線，小弟堅持有線聽歌，唔好問小弟點解！係可見將來，除非小弟玩其他A/V遊戲需要動態體驗，先有機會考慮無線連接方式。
線材自選
講開無線同有線，小弟又想評一評條原廠線，跟機有兩條一樣款既原廠耳機連接線，如果係刻意安排，SHURE想表達既信息好清楚，就係對自己既線材配套，有絕對信心！SE846用原廠線就掂，貼心奉送，唔使換其他線！
的確，聽完初感效果之後，小弟都有一種感覺，原廠線可能係大部份情況下都適用，小弟先比SE846行番一段時間，又試吓配用其他DAC同AMP，再繼續品評。
不過，小弟真正想表達既，唔係SHURE對自己產品既信心或貼心，係從用家角度考慮出發，唔好多送另一條原廠線啦，等用家自己投票，決定用原廠或另一類形新線。原廠線街坊價要四佰幾，如果SE846套裝賣平番幾百，幫補用家自己選擇線材，仍用家之福！
後記擇錄
配合SE846，小弟之後試聽咗ALO Audio Gold 16及其他線材，最後為SE846配上咗TAKUMI II，效果要比原廠線好太多。
小弟之後入手AudioQuest DragronFly Cobalt，為SE846提供一個優質流動訊源。
機緣之下，又得到Gold 32線材，配上SE846又有另一番新氣象！
最後再入手Sony IER-Z1R耳機，流動系統效果得到再一次昇華！
品聽分享
呢一節小弟想利用在線品聽分享一部份自己感受，由此陳述SE846配原廠線效果隨住品聽時間增長既變化。先介紹幾段youtube上既古箏彈奏，小弟特意配上詩詞培養感情，提升意景。
此曲只應天上有，仙女彈指為君奏；
弦琴譜音逸妙韻，人間能得幾回聞。
沒有留言:
發佈留言