小弟近日無意中發現論壇上一個ALO Audio Gold 16帖子，對佢有些少遐想，如果配SE846效果係點樣。有時都要相信緣份，經過相熟店鋪，又係無意中見到條Gold 16，金光閃閃，非常醒目，店長仲話有得試，你話小弟點會唔搭糖，直頭流哂口水。雖然小弟唔急於揾新線比SE846，肯定要會一會Gold 16，有試唔試，罪大惡極！
咁有緣份，係咪又會製造多一次流血事件，一試就放唔低，就地正法？Gold 16既初步體驗係點？心唔心急？興唔興奮？釣住癮先！
粗豪金閃
首先小弟要講一講Gold 16外觀手感，除咗金閃，仲係好有分量，感覺粗實，戴上耳有一定重量墜感，而且線身比較粗，好似掛咗條大金鏈，活動轉身都要有所適應，依小弟個人品味，係帶有幾分土豪味，行出街仲好可能引人犯罪！
小弟試聽咗條3.5/MMCX線，唔係好鍾意線頭線尾既透明膠接頭設計，銀線配透明還可以，金色配透明個格就低檔咗，反而另一條個金屬質感4.4直頭，就好配合Gold 16整條線既氣息，如果個3.5/MMCX頭都係金屬質感，格調就會高番幾檔。
合理預期
Gold 16既物理結構同音效特性，唔使小弟多講啦，根據呢d資料，就可以產生合理預期，對於一條身價超過7千既線材，點止有合理預期，心底裏面其實係會有更大既期望，甚至應該要用等待驚喜來形容！
小弟品聽咗大約15分鐘，試聽期中有男女人聲歌曲及純樂器曲調，應該都可以初步體驗Gold 16效果。小弟係雜食者，除咗喜歡暖底聲之外，自我感覺無其他特別偏向，咁小弟對Gold 16配上SE846有咩合理預期？期望？驚喜？
陽光溫暖
今次小弟品聽仍然係用手機3.5直推，其中原因係想比較原廠線及Gold 16效果異同。而且小弟想用呢個最簡約既系統，作為大部份流動時間聽歌之用。換句話講，就係唔用DAP同AMP，一部手機直播，對手機既音效部份就有要求，同時要求手機有獨立3.5音頻輸出。
小弟單刀直入啦，“好似太陽咁温暖”，就係Gold 16配SE846用手機3.5直出既概括性效果。首先係背景更黑，中低頻更富彈性，空間帶有一種穩重氣氛。人聲方面，密度，磁性感染力亦有所提升。至於音場及空間感就比較壓平，兩極伸延細節及音韻線條，特別係高頻部份出現模糊化現象，感覺就係“厚塊”咗。
打破平衡
上述即時體驗到既效果，唔可以話係有驚喜，畢竟以Gold 16既質料及身價來講，只能算係合理預期。好明顯，Gold 16係未開聲，未開聲既效果就打破之前SE846同原廠線得到既三頻平衡，側重多咗去中低頻，高頻明顯係缺咗一截。
唔難理解，品聽時間比較短，只可能發現Gold 16佢最表面一層效果，加上SE846本身係“微暖”，再用“陽光”照射，就唔係“暖”咁簡單，已經要用個“熱”字來形容。小弟要作出取捨，有咩係決定性因素？
深思熟慮
Gold 16配SE846既大部份表現其實係合符小弟估計，只係係高頻方面“失衡”超出咗預期比較多。試聽期間，當小弟品聽到古箏彈奏高音亮麗部份既時候，就有咗定論，而且就係決定性因素！
好明顯，小弟呢個簡約系統，訊源及耳機(Mate 20X及SE846)都不變既情況下，配Gold 16係無解的！因為即使Gold 16開咗聲，小弟都唔認為可以做到好似當前原廠線既三頻均衡效果。
係小弟現有流動設備中，老爺級既AK100，HP-V1膽AMP同Hugo，前兩者比較中性偏暖，後者中性偏冷，如果用AK100經Hugo過Gold 16再推SE846，可能會有一部份再平衡效果，不過咁就失去咗小弟當前想要簡約流動系統既原意。
小結
聽完初感之後，覺得Gold 16適用性唔係親民個格，係好有個性，要推到開好聲，似乎都需要有性格訊源配合，特別係大開大合高動態者！從一開始，期望用手機推Gold 16出驚喜效果，就已經係不切實際！
小弟絕對相信開咗聲既Gold 16係會有讓小弟驚喜既表現，大前題係要有合適既匹配，體現整個系統組合既總表現。可惜小弟短期內無意再投資入去新DAP或AMP，對Gold 16暫時只能講有緣無份，未能作出養佢一世承諾。
最後，今次品聽使小弟更了解SE846及原廠線。其實，真正既驚喜巳經出現咗，係出文時，SE846已經行咗幾十個鐘，出現明顯品聽效果提升，向小弟既終極要求“一體臨場”走近咗一大步！請繼續關注另文SHURE SE846 - 經典之選。
後記擇錄
小弟係試聽Gold 16之後幾個月，有幸入手一條 Gold 32 (ALO Audio Gold 16 x 2)，又係另一個故事。
相關文章
Android 手機有 SRC 48khz 限制, 先天不足，音質不預期有驚喜
回覆刪除小弟會搵機會用AudioQuest Dragronfly Cobalt再試一試推Gold 16配SE846，睇睇同手機3.5效果相差幾多。
刪除C兄有冇用過Gold 16?