話說小弟自從聽過ALO Audio Gold 16之後念念不忘，對佢開聲之後既效果好有期待。最近再試聽過金磚(Sony NW-WM1Z)“開陽淳厚”既玩味演譯。係咁既背景下，小弟決定冒險，想入手Gold 16，目的係係現有Cobalt配SE846及TAKUMI II效果之外，玩味一種“淳厚柔盈”，近似“膽音”風格！不過，最後到手既唔係Gold 16，而係Gold 32！
Gold 32投入小弟既懷抱，係一個奇故事！Gold 32既第一響聽感太驚奇！完全唔係小弟既預期！小弟既品聽經歷，真係多意外，真係多波折，雖然又再多一次表錯情，但係每次既結果，驚嚇之後，繼續來既總係驚喜，比預期更好既收獲！
金鏈傳奇
小弟用些少篇幅介紹Gold 32。如果Gold 16係金線，咁幫Gold 32起一個傳神既名“金鏈”，完全唔誇張！金鏈同金磚有無關係？有！如果想做土豪，佢地係絕配！講吓笑，小弟之所以咁講，係發現金鏈既效果(下文再詳評)，如果配金磚，極有可能係大驚喜！小弟會唔會入埋金磚做土豪？可見將來應該唔會，小弟仍然樂在其中，繼續做“無腳既雀仔”！
醒目既C兄一睇就知，金鏈唔係現成市場既產品，並唔存在一條叫ALO Audio Gold 32既線材，金鏈只可能DIY或經二手市場獲得。小弟呢條金鏈，係有玩家割愛係二手市場出讓。金鏈呢類“玩味”線材肯定係唔會多見，小弟無咩大考慮就果斷出手，第二日就完成交收！
其實金鏈到小弟手，已經係三手，佢係用兩條二手Gold 16打造改為32絞芯，上半部保留原有圓形燈籠織法做左右分線，下半部用每4芯嘅8股方形編織，再配上Eidolic接頭而成，大約有一年半開聲歷練。整體品相算係唔錯，有8成新淨，睇得出有明顯使用過磨損，接頭鍍金變淡，芯線包膠位有幾個地方亦有損傷，要用些少銀兩及時間處理一下。
小弟唔打算對手上既金鏈做大改動，只係加咗一對兩針去MMCX轉頭，配合SE846使用，另一邊平衡2.5頭剛剛好可以接到原有既3.5L[2.5]。銀灰金屬接頭及Y位，大幅度減低金鏈土豪味，整體氣息睇落又有形格，正合小弟品味！不過，真正既重點其實係，小弟想飲金鏈“滾紅滾綠”，飽經歷練之後，最精華果啖湯！
小弟而家多咗個新系統，Co32g846(Cobalt + Gold 32 + SE846)，佢同現有既CoTak846效果，同TAKUMI II對比，有咩異同？
開闊揚場
金鏈一出聲，小弟就知道自己又表錯情！因為之前對Gold 16既體驗小弟先入為主，以為金鏈會係“厚暖”聲底甚至有“過熱”預期，一開始對佢其他既特性其實亦係所知甚少，小弟就咁用直覺入手金鏈，算唔算係一個冒險？
其實唔係冒險，簡單既講法，以大約當前Gold 16市價既60％入手呢條金鏈，唔理效果是否一如小弟預期，點都唔會差得去邊，對於玩嘢成性既小弟來講，始終都會係物有所值，如果要入手Gold 16，倒不如入手金鏈，係無得輸！
講番金鏈開聲，感覺唔到同TAKUMI II既效果有咩大分別！小弟心想，大鑊！又係一樣聲既！同之前聽Gold 16既效果，完全係兩碼子事！就算係開咗聲既Gold 16，都唔應該係咁架！
持續咗大約十分鐘，小弟既心情總算放開咗，因為聽到金鏈出聲開始有變化。首先，就係音場既擴大，唔係一般既闊度或深度，係一個圓形擴張，好似從180度變成360度，有一種置身其中既包圍場感！其次，就係分析力，最少亦提升咗一個檔次！
小弟品聽咗一節大約兩個鐘，金鏈係處於明顯變化期，小弟唔想咁快下咁多判斷，等佢出聲效果比較穩定之後，再分享佢既持性。有一點可以肯定，金鏈既變化，正係向小弟原先對佢預期既另一個方向發展！
整裝待發
小弟呢套微型流動系統以Cobalt及SE846為核心，配金鏈及TAKUMI II，再入齊埋一套轉插頭，3.5L[2.5]，2.5L[4.4]，4.4[2.5]及3.5[6.3]，整裝算係告一段落。
就算Cobalt只係有3.5輸出，通過呢套轉頭，都可以得到最大發揮，可以配得上當前各種流行音頻接頭2.5，4.4及標準3.5耳機，甚至係用6.3既大耳牛！另一方面，SE846經金鏈及TAKUMI II，同樣都可以通過呢套轉頭，連接當前流行既2.5，4.4及標準3.5輸出音源。
係日常使用方面，除咗3.5[6.3]之外，其他轉頭串起來成為一頭3.5出接Cobalt，一頭2.5入接金鏈或者TAKUMI II (後面兩個轉頭做一個2.5及4.4迴轉)，就變成一個“冂”字。配合手機連接握持，剛好可以用母指及食指之間虎口位承掛，轉頭及耳機接線可以經過手背過渡。係收納方面，亦方便同時一次過放入硬膠盒。雖然最終出聲有些少“緊札”感，但可以接受，而且一次過同時推埋轉頭備用。
講又講，咪鬼理手機背下面果片圓餅咁款既黑石，係小弟要來扮嘢，話可以減低手機電磁波抗干擾，自欺欺人玩心理，自我感覺出聲良好。
金鏈療傷
金鏈到手時，幾條芯線外層包膠有損傷，小弟決定自己為金鏈療傷，呢d手作仔嘢，難唔到小弟既。執齊療傷架撐，其實成本同揾專門師傅修整差唔多，小弟都係信自己，又想過吓手癮。
實際既療傷細節就唔詳講了，流程大概係先用牙簽分隔受傷芯線位置，用尖平剪修齊傷口，用清潔劑洗傷口，再補上填充膠，最後加上一段透明熱縮管保護受傷位置，處理之後，受傷位置就應該唔會再惡化。
超級均衡
小弟入手咗金鏈一段時間，經過幾個月潛水品聽之後，已經完全確定佢既特色定位。由最初感受到既開闊揚場，大一圈置身其中既包圍感之外，分析力亦提升咗。不過，小弟要特別提出既係，三頻響應方面，感覺上要比TAKUMI II更均衡，亦係小弟聽過最均衡既效果！
雖然SE846本身以均衡響應作為賣點，中低頻固然出色，係高頻方面小弟個人覺得，相對伸延性，有些少未盡餘韻。體現係人聲，特別係女聲效果就有些少輸蝕。雖然配上TAKUMI II，使SE846既音色更悅耳美麗，但係係呢方面就未有特別改變。小弟最終亦將SE846調音棒改成提升高頻，不過，感覺都仲係差咗些少嘢！始終未能提升足夠韻味！
金鏈就可以改善上述既不足(其實唔單純係高頻響應因素咁簡單)，人聲獨白變得感性提升咗感染力，又不至於去到飄逸仙氣誇張程度。係低頻方面，相對於TAKUMI II就無咁沉重，都仲係非常漂亮有質感！如果話TAKUMI II適合節奏性強旋律，咁金鏈就係所有地方都顧及到，體現一種“超級均衡”感受！
晶凝通透
或者有C兄會問，超級均衡係咪暗示金鏈無個性？金鏈係非常有個性！完全唔會覺得平淡無味！其實佢既個性就係“超級均衡”！比一般所指既三頻響應均衡，要更進一步，涉及到音形及空間既建構！
金鏈比出一種好似“殘響”效果，好似相互“均衡干涉”，結果係構建成一個非常有組織多層次感既特殊空間。呢個非常有組織多層次感既特殊空間，不但體現出立體感，而且仲係非常有穿透性！如果TAKUMI II係比出“玲瓏浮突”既立體實質音像，咁金鏈就係“晶凝通透”，唔單止有外在曲線，仲要透視睇埋裏面都要係咁正！散發一種透視空間，富有典堂貴麗味道，使人陶醉既獨特悅耳音色！
小弟覺得金鏈呢種超級均衡，絕對同佢多芯線及編織方法有直接關連！可能係小弟孤陋寡聞，暫時係其他線材，仍然未聽到類似效果，小弟相信金鏈同Gold 16既原有效果亦有好明顯差異，已經不能同日而語，所以而家只能話係金鏈既獨特性能！
再三平衡
話說金鏈配試Sony IER-Z1R耳機效果唔理想之後，小弟繼續將佢專注配合SE846。雖然小弟話金鏈有一種“超級均衡”效果，品聽輸出似乎一路仲有改變，越聽越“秀”，甚至出現有“瘦”感覺，頻響好似成段上移咁，低頻效果明顯有所弱化！
呢種低頻弱化既結果，同小弟最初對金鏈既預期係完全相反方向。直覺上金鏈前身係Gold 16，線材質料係OFC銅料鍍金，三頻響應應該係比較中性或者有些少強化低頻，金鏈斷估都係唔會有太大出入。結果呢，金鏈越聽越走“高清”，完全唔係小弟預期既“暖厚”！對於金鏈耳聽為實得到既效果，小弟無法解釋，只能自然地推想同佢既多芯編絞，接線頭等等各組成部份有關！
可以肯定，唔係小弟一時“腦放”既心理作用！小弟最終將SE846調音棒再三轉換，由開始品聽金鏈時既提升高頻(加亮)，改成中性，之後再改為衰減高頻(加暖)。金鏈又再重回“超級均衡”，低頻重拾彈性同層次感，繼續演繹“晶凝通透”典堂貴麗！所不同既係，新既平衡同時開始展現出一份“淳厚”味道！驚喜！！正呀！！！
小弟突然產生一個念頭，金鏈效果仲可以有幾大變化？如果用煲線機，猛火滾一滾32芯既金鏈，會唔會可以完全發揮佢既潛力？
後記擇錄
有關更多Gold 32資訊，對比其他高階線材及配合其他耳機效果，可以參看另文，Titan-Au/ Titan-Ag 試聽初感。
相關文章
沒有留言:
發佈留言