話說小弟今日預約找上門，係老地方私密約會咗一對金銀巨人兄弟！先去圖刺激吓各位C兄眼球。
首先，非常感謝店長安排相關耳機線比小弟試聽！小弟就先來一章開場白，醒目既C兄可能巳經係圖裏面認出呢三條入耳式耳機線，佢地都係當前其中高階有特色者。
圖中右邊上面金色及下面銀色既，分別係本文主角Titan-Au及Titan-Ag，佢地係咩背景咩料，小弟唔係做緊產品推廣，唔特別講了！淨睇個名就知道猛料！總之係正嘢！有興趣既C兄自己去掘料！
圖中左邊金色大條d既，係小弟現有既Gold 32。關Gold 32咩事？非常關事！小弟之所以會試聽Titan-Au及Titan-Ag，完全就係因為Gold 32！
Titan巨人
小弟又例排繼續先吹一段水，其實呢對Titan-Au及Titan-Ag金銀巨人兄弟，一早已經吸引咗小弟眼球，係小弟揾線材配SE846既時候，就已經留意到佢地。小弟最終選咗TAKUMI II，感覺佢夾SE846最合適，同時考慮到試聽效果及性價比因素。當時亦比較咗同TAKUMI II差唔多級別既純銅及鍍銀線材，但無一次過試聽埋最頂級既Titan-Au及Titan-Ag。
點解小弟當時唔試，而家又試？好明顯，係一個時機問題(其實係小弟驚，驚一聽就做錯事)！點解而家係一個合適時機(而家又唔驚一聽就做錯事)？所以小弟一開始就話，完全係因為Gold 32！因為小弟既Gold 32，係清潔整修聽咗幾個月之後，小弟確定佢已經穩定開聲，而且效果獨特非比尋常！頓時激起小弟要揾“合適對手”，對比求證Gold 32同當前高檔線材之間效果異同！
強強對比
小弟將兩條Titan線材同Gold 32一齊合照，就係想點出呢個主題，試聽一定要有對比先可以接地，唔會虛浮！試聽之前，係小弟心目中，覺得Gold 32已經係Titan級數！試聽就係求證，同時亦想體驗Titan既獨特效果！事實上，試聽完之後，完全符合小弟預期！
首先，Titan果然係名符其實既巨人本色(試聽感想後文詳述)！Gold 32泊埋去，有冇得比？先比一個引子，小弟聽完咁勁既Titan效果，都無即時中佢劇毒出事，就表示Gold 32本身既毒性已經係幾咁強！小弟中過Gold 32毒之後再試Titan，就無咁易毒發！Gold 32煉成之日，咪就係小弟試聽Titan既合適之時囉！
Titan同Gold 32既效果對比，小弟又例排先比個概念性既說法：強強對比，各有千秋！唔比唔知自己正！唔比唔知自己勁！試聽分享會分為兩部份，Titan效果及Gold 32對比。
各有千秋
係分享Titan試聽體驗之前，首先來一個基本介紹比較三條線材，之後再睇文就更容易理解。Titan係當前市場既高階線材，而Gold 32並非現成市場產品，係拆散兩條ALO Audio Gold 16再編絞而成，基本上好難有一個直接標準去衡量佢地既價值。
其中一個最簡單而粗暴既方法，就係睇售價，雖然唔係一定越貴越好，不過小弟同時相信一分錢一分貨。Titan係屬於1w8既價位水平，Gold 32本身係兩條Gold 16，如果全新合成(小弟自問唔會咁做)，加埋人工燈油火蠟頭頭尾尾配件，都係大約呢個水位。對於小弟現有既SE846，就算係最新入手既Sony IER-Z1R，呢個價位線材選配明顯係妹仔大過主人婆。
係另一個角度睇，Titan作為高階線材，好自然會標榜用料同製作工藝(小弟唔引述啦)，Gold 32係DIY線材，無任何參考技術指標，所標榜既大概只有係佢既32芯編絞(相對Titan既10芯)。講咗咁多枱面嘢，都係得個講字，最終都係要回歸根本，耳聽為實，鬼叫你聽到分別咩，問題只係合唔合口味！
耳聽為實
首先要勾起各位C兄既毒癮，小弟報告Gold 32最新煉成效果，係一種“超級均衡”，同時體現係三頻響應，音像及空間建構各方面，係一種“晶凝通透”，富有典堂貴麗味道既悅耳音色！建議C兄先睇完Gold 32另文，再睇本文Titan試聽分享，更能體會小弟感想。
好啦，C兄對Gold 32有咗一定既印象之後，就開始講Titan既效果。兩條Titan線材，小弟都分別聽咗30分鐘，先聽Titan-Ag再聽Titan-Au。雖然佢地既頻響表現唔同，整體感覺同Gold 32比較係同一個級數，或者係因為個樽頸位係SE846，無法明顯分別更高階線材性能！
先來一段概括性既第一印象分享，Titan線用咗十零分鐘熱身，就聽出佢地既實力！係好札實果個實！係好實在果個實！唔好誤會，小弟所指實者，係無緊同重既涵意！完全就係一種質感既體現！
小弟從未聽過咁“實淨”既效果，音像線條好似健美先生肌肉上埋油既質感，直頭可以反光！係呢方面，完全技術性擊倒咗Gold 32！不過咁唔代表Gold 32渣，只係Titan太勁！
相對Gold 32，Titan既背景亦比較黑，係黑到有死寂果種感覺。音場方面，Titan同Gold 32相近(覺得係SE846極限)，全部都要比TAKUMI II大一個圈，而且完全係有“臨場到位”既感覺！
小弟進一步分享兩條Titan線材既特性及對比Gold 32。首先，係Titan-Ag，一睇個名就知會有咩大概預期效果。非常光亮，直頭係光芒耀眼！整體音壓明顯提升咗一個大檔，而且唔係得個亮字，仲有一種充氣感，動態表現非常理想，成個音場好似一個巨大氣場！
呢種空間音場係有膽味影子！不過豐厚有餘，悠盈不足(同樣覺得係SE846極限，匹配問題)。同Gold 32比，雖然同樣有通透感，充滿擴展性動能，不過唔係Gold 32果種相對斯文，晶凝典堂貴麗味道。係三頻響應方面，配上小弟既Cobalt及SE846，低頻部份係過咗火喉。
試聽時店長亦有提示，Titan-Ag好多時，係作有針對性，配對有獨特個性耳機之用。雖然覺得Titan-Ag技術性能強勁，但係配小弟現有系統，感覺就係唔夾，仲有些少大材小用！
生活存在
終於來到全文高潮，小弟繼續分享Titan-Au既效果。好明顯，Titan-Au既表現就係均衡得多，配上小弟既Cobalt及SE846，三頻無嘢好講！空間音場無嘢好講！分析力其他技術性無嘢好講！
無嘢講都算係全文高潮？首先，再從溫一吓TAKUMI II係“玲瓏浮突”，Gold 32係“晶凝通透”，用佢地作為對比，咁Titan-Au就係“生活存在”！無錯，有一種呼之欲出，活生生既存在感！小弟想強調既，就係結成既像意。
再進一步既講法，TAKUMI II既效果係比較單純，體現係點線層面，Gold 32體現係空間之中既建構，Titan-Au就係涵蓋點線面立體成像！小弟講到咁，仲唔係高潮！
咁Titan-Au咪贏哂？的確，如果單以個別技術特性衡量，佢都係勝Gold 32一籌，特別係佢既主體成像，簡直就係一絕！雖然係咁，小弟覺得Gold 32既超級均衡，係整體性既演繹效果始終係立於不敗之地！
初聽小結
首先，小弟想一再強調，本文所述試聽效果，完全係係小弟既獨特環境及器材，有限時間及純粹個人好惡取捨既體驗。
係出文後，原來Titan已經出咗一條新版線Titan-Ag+Au，賣點係混編多種線材，達到更均衡效果，有進化係好事！
老實講，如果小弟係未入手Gold 32，試聽過Titan之後，好大機會就會出手。小弟始終係比較理性，了解當前系統既樽頸係SE846，如果日後升級更高階耳機，Titan肯定就會係選擇之列！
後記擇錄
由於小弟已經入手Sony IER-Z1R，算係當前其中一款高階耳機，性能比SE846的確係高出唔少，Titan係咪適合作為Z1R升級線？可唔可以超越已經咁正效果既原廠線？
沒有留言:
發佈留言