佢佢佢 ...... 真係一聽難忘！直情篤正小弟死穴！避得過Titan巨人，避唔過Sony IER-Z1R經典信使既誘惑！
話說小弟之前試聽完Titan線材，發現強勁效果同 Gold 32各有千秋，屬同一個級別水平之後，心生疑問，配上頂級線材，系統既效果係咪巳經到咗極限？似乎就係啦！線材已經唔係樽頸位！
小弟覺得配咗Gold 32或Titan後，樽頸位已經移咗去SE846果度！小弟好自然又想求證吓SE846同更高階經典耳機有幾大差距，今次選咗Sony IER-Z1R比試，本來只係想係咁而聽十零分鐘了咗個疑問，完全無想過會出血！點知一聽就成個鐘，仲要出咗事帶埋佢返屋企。Sony Signature同系列既金磚WM1Z同黑磚WM1A都未能說服到小弟，反而Z1R就成功俘虜咗小弟個心！
經典信使
雖然話SE846已經到咗極限，佢配上TAKUMI II及Gold 32之後，其實巳經好正好打得，同時可以比出小弟要求既“一體臨場”效果，小弟認為Cobalt及SE846呢一對組合既基本特性係“直白美麗”，作為日常品聽小弟其實再無咩要求！
Z1R之所以可以觸動小弟神經，勾起小弟條痴根，第一原因係因為佢靚仔！第二原因係因為佢有型！第三個原因係因為佢比出一種另類風格，呢種風格大概就係Sony Signature既一種體現。呢種係小弟之前係玩膽機Tube Rolling時得到既似曾相識經典體驗！無錯！就係膽味！
小弟既Z1R係配合Cobalt下既獨特效果，即使只係用原廠3.5線材，已經感受到係一個全面性既升級，用個更靚既形容詞，叫昇華！就初聽感受，小弟覺得呢個組合有好大進步空間，特別係，當再配上Gold 32之後，就成為CoG32Z1r (Cobalt + Gold 32 + Z1R)，真係未聽先興奮！未聽先打冷震！
配戴初感
小弟遲來的開箱，就唔浪費口水係部件說明啦！只係想分享些少配戴及初聽體驗。首先，Z1R既設計好明顯係以最高質效果輸出為大前題，竟然做出頻響範圍3Hz-100kHz，最直接音效路徑，12mm動圈驅動單體，所有優化設計，都睇得出充滿執着！
不過，針無兩頭利，人體工學方面既考量就相對減低咗！Z1R係小弟用過最難戴既入耳式耳機！佢既深厚大直徑體腔，加埋佢既體重，真係好難戴得穩陣！小弟試聽時，Z1R已經出現幾次鬆開！入手後，試過原廠所有耳套，基本上無一個大小形號可以戴得完全穩妥！
小弟得到最好效果係中碼矽膠套(音效行先，舒適為副)。但係，Z1R差唔多有四分一體腔係露出耳廓之外，頭部動作太快都容易鬆開，一句講晒，就係唔貼耳！將耳機線Y位既收線膠上移，可以有些少改善。另外，耳套對音效既影響非常敏感，用大一號同用少一號既差別，直頭可以用“巨大”來形容！好似變咗另一隻耳機咁！
聽講話Z1R係出名難推(亦係小弟選擇佢既另一個原因，難推先可以考驗音源實力)，網上有評論甚至話，用同系既金磚同黑磚DAP推佢，效果都未盡如意咁話！或者有C兄會質疑小弟，用Cobalt呢種USB型音源，仲要經手機攞電，推唔推得好Z1R？！係唔係老作？！的確，Z1R相對SE846係大食好多，同樣既音壓體驗，Z1R既音量要調到50％以上，SE846就只係30％左右。
睇來小弟要花多些少時間同Z1R磨合，食得咸魚就要抵得渴，鬼叫自己鍾意！係未來幾個月，小弟就會力煲Z1R(用Cobalt推)，品聽分享會分為兩部份，先分享原廠3.5線效果，再換Gold 32分享終極成果。
淳厚悠盈
係呢一章，同各位C兄分享一下小弟情不自禁既喜悅！
未入手初聽Z1R既第一感，除咗低頻有過火雷轟感之外，基本上係平衡演繹，幾分鐘熱身之後，感受到既就係一份全新既驚喜，當然係相對性既說法，係對比當前SE846配上Gold 32所得效果，竟然係全面性提升！
即時既體會係，音場空間感大咗一個圈，係一種被包圍感效果！不過，真正使小弟流鼻血出耳油者，係繼續呈現出來“淳厚悠盈”，迅態氣動，空間充滿擴張能量場！雖然小弟無出過聲，只係靜靜地繼續聽落去，但係，內心係非常激動！竟然係呢個時候聽到膽味！即刻動咗殺機要買起佢！唔係！應該係動咗佔有慾先真！
好啦！驚喜繼續！小弟果然係英明決擇！Z1R無使小弟失望！係入手後品聽未夠十個鐘，之前雷轟感已經大幅收斂，低頻變成既廣且深震撼效果！然後Z1R再來一次“爆開”，音場空間感唔係再擴大多一個圈咁簡單，直頭係大爆炸宇宙無限，整個時空都充滿能量！巳經唔可以再用全面提升來形容！而係級數式既昇華！
而家都只係講緊配原廠3.5線材既初步效果，換上Gold 32之後，真係好令人期待！所謂Z1R難推，Cobalt推唔好Z1R既疑惑亦一掃而空！
優化力煉
入手Z1R來到第二十個鐘開聲呢個階段，基本上巳經大致確定佢既聲底及初步特性。
當前除咗低頻響應仍然覺得多咗些少之外(期望開聲耐咗，磨合之後會續步消減)，已經完全無咩好講啦！Z1R定位“淳厚悠盈”既同時，就係果種類似“琥珀色”既音染氛圍及“柔和”既輪廓線條，好似手機防藍光護眼模式，不過佢係“護耳耐聽”演繹！
係技術性能方面，Z1R係黃金六角測驗既表現，各方面都係要比SE846更勝一籌。咁當然，以Z1R等於一倍SE846身價既對比，完全係合理預期同要求！
要盡量發揮Z1R既潛力，除咗用Cobalt力煲推煉，仲有一大段路要行！首先係換用4.4原廠線，配3.5[2.5]及2.5[4.4]兩個轉換頭，代替初試聽用既3.5原廠線，目的係方便Z1R以4.4平衡連接品聽其他平衡訊源。特別係，小弟唔排除時機成熟既時候，用Z1R再去會一會金磚WM1Z！
另一方面既優化，係覓識更好既耳套，方向係淺闊形號，希望係隔音之餘，可以使Z1R更入耳貼耳。當然，最後既高潮戲肉，就係要入一對合適既MC去MMCX轉接頭(Z1R個座頭特別肥大！)，將Z1R接上Gold 32，品嚐終極體驗！
幸福偶遇
幸福的確唔係必然的，有時就係要靠一點點緣份！小弟絕對唔會無端端入手Z1R時用一隻USB型既Cobalt去做目標配對，之前亦無任何參考，所以呢種機會率就係零！只可能就係呢種陰差陽錯既偶遇，無心插柳Z1R先會撞上Cobalt，佢地一泊埋效果又真係好得！最起碼巳經可以使小弟即時要留住Z1R，Cobalt立咗大功，使小弟荷包再出血！
出文之前，小弟剛剛將Z1R移離Cobalt，改直插手機3.5音頻輸出品聽咗15分鐘。係SE846既情況，雖然配上Cobalt及手機3.5直出效果係有明顯分別，但後者仍然相當飲得杯落，日常流動悠閒品聽係無投訴了。
好啦，講返Z1R用手機3.5直推既效果(引發小弟感想寫出呢一章)，一句講晒，慘不忍聽！就係一塊肥豬肉！唔想講落去，驚唔出得街！總之呢個效果比小弟既預期要差好多，估唔到Z1R同SE846之間既差距可以有咁大！SE846果然係親民好多！唔怪知得話Z1R難推！
呢個效果同時說明另一個事實，配上Z1R之後，就更顯現出Cobalt既必要性！都話咗唔好睇小Cobalt係USB型訊源，佢只會不斷製造驚喜！Z1R亦係非池中物，爆起來，悠起來，真係唔同你講笑！Z1R配上Cobalt而家已經有“悠盈感性，神級偉大”既震撼感覺！
小弟準備比Z1R同Cobalt呢對組合磨合3個月之後，再去體驗一下WM1Z + Z1R既實力，同時對比Cobalt效果，品評佢地既真正身價！
深度體驗
小弟既Z1R品聽，差唔多來到第30個鐘，效果似乎已經初步穩定落來，而且有進一步向質方面既演進。
首先，經過一輪磨合調節，配帶Z1R已經比較穩定舒適，主要係要轉動MMCX接頭，調節線材與機身及耳廓角度達到同一垂直面掛耳效果。
係耳套使用方面，小弟返復再試原廠兩組產品，確定只有矽膠套可以比出小弟期待效果！所謂三倍舒適海綿系列耳套，對小弟來講完全係唔掂！中低頻響大幅削弱，音像變得“瘦遠內陷”，完全失去“氣動”及“臨場到位”包圍感！係尺吋方面，矽膠耳套中碼係最理想，大號戴唔穩，細號音色改變太多，效果同樣走向“瘦遠內陷”！
話合適既耳套係一切成敗既關鍵，完全唔係誇張！Z1R之所以難戴，效果對耳套敏感，根本原因係佢既粗長入耳導管，Z1R同SE846比較，真係肥大好多，大概係佢先天最優響應設計要求既死症！
經過之前配戴體驗，小弟覺得選擇耳套有兩個條件，第一當然係要隔外音，第二係要選無填充物料，純粹以空間作耳機及耳腔隔離設計，Z1R既獨特音色先能夠得到最大發揮！當然，小弟既預期係咪正確，有待證實。
網上爬文參考前輩分享，有幾款耳套配Z1R有滿意效果，分別係Final Type E (Clear)及JVC Spiral Dot/ Dot++，佢地可以減緩Z1R低頻過轟既效果。小弟用原廠矽膠耳套品聽三幾個月之後，如果低頻過轟都無收歛，就會試一試上述非原廠耳套。
期待驚喜
係呢一章，小弟要分享Z1R得到既最新成果，相信就係Sony Signature系列Z1R係小弟系統既終極體現！小弟亦會分享原廠線，TAKUMI II及Gold 32既效果對比。全文高潮即將上演！先出住圖刺激C兄眼球。
係上演全文高潮之前，小弟想先回顧一吓Z1R既品聽體驗(相對於SE846接上Gold 32用Cobalt推既效果)。首先，係初聽“大一圈既包圍感”，跟住就出現“淳厚悠盈”既膽味，然後係入手後既“大爆炸宇宙無限”！係短短既30個鐘左右品聽，就有咁既成果，實在係一個好大驚喜！
呢一切，Z1R只係用原廠線都有咁既效果，咁換接TAKUMI II同Gold 32既效果係咪識飛？特別係配Gold 32既“超級均衡”特性，小弟係好有期待，一直都將注意力放係呢個Z1R + Gold 32未聽先興奮既組合！
小弟跟住分享佢地相對原廠線既效果對比。先來Z1R + TAKUMI II。雖然仍然有類似既音場空間感，但係少咗一份“臨場到位”體驗，音像相對比較平淡無咁有立體感。最大既不足，就係失去一份“悠盈”，迅態微動響應不足，低頻部份變得塊厚沉重，層次感減退，簡單講就係唔理想！
好啦，終於到咗期待已久既Z1R + Gold 32效果。Gold 32既“超級均衡”特性果然係發揮作用，仍然有一種通透貴麗既悅耳音色，可惜呢種效果表現係多咗啦，出現“空洞”唔太自然感覺！Gold 32亦表現得“太斯文”，好似推唔起Z1R，音像有些少“瘦遠內陷”，同時亦有低頻沉重，欠缺層次感現像！一句講哂，好失望！
不再妥協
原來，從來都係小弟自己既一廂情願，預期係SE846得到良好效果既TAKUMI II及Gold 32，順理成章配Z1R都會有好效果，期待驚喜！結果係期望越大，失望越大，係一個打擊同教訓！
Z1R配上TAKUMI II同Gold 32效果未如理想，打破咗小弟既固有概念，特別係對原廠線一定要換既偏見！同時小弟亦感受到Z1R既作者，係線材運用上付出既努力，配合所得到既獨特效果，唔係用家自己盲目組合可以輕易達成！簡單既講法，Z1R唔止難推，仲會係難夾！
此時此刻，小弟既腦海中就咁閃出一個意念，最好既可能巳經係身邊！應該係，最夾既可能巳經係身邊！就算要搵到更夾既，都要付出不菲既時間同代價！突然間，小弟唔想再妥協，將Cobalt上既轉接頭全部移離，收返TAKUMI II，Gold 32及4.4原廠線。Cobalt再次接上3.5原廠線品聽推煲Z1R，體驗當前系統最直接高能效果，亦係對Z1R經典信使既一種尊重！
鮮活感性
話說小弟係一輪換線摸索之後，最終決定以原廠線材推煉Z1R達到最佳品聽效果。雖然換線結果小弟得唔到驚喜，但係Cobalt + Z1R呢個組合(應該仲要強調配上原廠3.5線材)，實在係驚喜不斷，可以話係有齊小弟喜愛既所有元素！
出文前既最新效果，Z1R不斷滲透出“淳厚”味道，感覺係越來越淳。另一方面，迅態微動響應不斷提升，係鉅細無遺既分析力下，同時展現豐富柔和多層次立體感，一致協調既音像同空間定位，真係牡丹綠葉同樣精彩！
雖然小弟一直強調Z1R圍繞住“淳厚悠盈”，最難得係配合Cobalt既“恬淨美麗”，其實係同時擁有“淳”同“恬”。應“淳”則“淳”，應“恬”則“恬”，“淳”中有“恬”，“恬”中有“淳”。“淳”同“恬”，相互交融，如魚得水！
再加上“厚”同“淨”既特性，“悠盈”同“美麗”既催化，就係一種充滿“鮮活感性”既演繹！所以小弟一開始就話Z1R配上Cobalt，巳經唔係一種升級，應該叫做昇華！而且小弟好相信，呢種“鮮活感性”效果，就係Sony Signature係小弟系統既終極體現！
品聽小結
小弟曾經話Cobalt使小弟懷疑人生，而家Z1R(配原廠3.5線材)使小弟再一次懷疑人生！小弟嚐味過呢個組合既“鮮活感性”，未至於話之前其他既體驗，都係乏味既“咸魚人生”。但係，絕對會有憂慮，驚死食唔返，食神果碗“黯然銷魂飯”既味道！
