Titan-Au/ Titan-Ag 王者氣度

話說小弟之前“Titan-Au/ Titan-Ag 試聽初感”，當時流動系統只係剛成初形，以AudioQuest DragronFly Cobalt及Shure SE846就咁走去接Titan線材試聽，歧途感受一下巨人氣息，感覺的確係不同凡響！但係意猶未盡！

今次小弟有備而來，再搵上門，同金銀兄弟再溝通，所不同者，今次係用鋼磚iBasso DX220 Max配Sony IER-Z1R招呼Titan，作為“經典試聽大計！我的痴線！”，尋找痴線既第一炮，究竟小弟有咩得着呢？

平常心境

開始分享之前，例排又要吹一段水，講吓試聽前心態，所謂平常心者，係不受以往經驗及偏好所影響，純粹以當下所得聽感，當下直接感知，當下欣賞享受為取向，盡量唔好因為預設條件過早下落評價！

其實來到呢種層次，基本上巳經唔會係技術問題，亦唔係單純夾唔夾，為做決擇而試聽！而係係過程中，體現到其中精粹，有所得着！一如小弟係尋找痴線中提到，揾唔揾到係一件事，享受過程先係重點！

對於試聽Titan呢類頂端線材，更加要抱住享受體驗心態，過早以取向判定，反而可能就係自己損失！咁當然，如果不幸中毒，代價就要自負！

試聽分享

首先要感謝有關店商及店長安排，讓小弟再一次同Titan交流！試聽過程大約係一個半鐘，先聽咗Titan-Ag，之後再聽 Titan-Au。點解無Titan-Ag+Au？因為係要特別訂製，所以無存貨無樣版試聽。小弟向店長確定，Titan-Ag+Au就係前兩者之間既效果，所以亦唔難預估。

分享會集中同第一次試聽，及同Z1R原廠線效果對比，當然亦會有小弟係意像層面既主觀評論。

試聽期間，出現一段小插曲，雖然小弟係有備而去，巳經自備2.5[->]4.4及2pins去MMCX轉頭。最終都係棋差一着，歷史重演！Z1R夾食MMCX線頭！聽完Titan-Ag想轉線聽Titan-Au，接線頭比較短身而光滑，幾經努力仍未能拔出，最終要店長用膠帶保護防磨花，再出動尖咀夾搞掂，聽完Titan-Au之後，又再來一次用力拔頭大行動！

Z1R個輸入座比較深，店長話配線時，要改用長身型號MMCX線頭。另一方面，如果最終造線，輸入端用直頭對手持流動係唔方便，小弟希望可以改用4.4L，可惜當前所知，未有4.4L線頭能入到Titan 10芯線。

係吹水期間，店長又不忘Sell吓嘢，建議升級去Pentaconn 4.4，似乎睇穿小弟如果真係造線就會升級。事實上，小弟更加希望延長線材長度，最少有1.3m，係考慮到手攜時減低拉扯機會。甚至去到1.5m，可以打3圈造個小蛇餅，覺得輸出效果會更理想！

返樸歸原

今次Titan聽感，先講概括性定調，用簡單八個字講完，“返樸歸原，濃厚澤潤”！小弟完全可以感受到Titan既獨特定位！

作為對比，小弟首先回顧返Titan第一次配合Cobalt + SE846既演繹，感覺到既質感非常實在，實在到好似有光澤既“肉地”，真到唔信係真既感覺，即係一種“生活存在”感！好明顯，係換上 Titan線材之後，Cobalt + SE846既變化，係可以用驚喜來形容！當時無入手Titan，係覺得時機未成熟！

Titan係鋼磚＋Z1R既效果，又係完全另一回事。小弟首先感覺到既，係一份絕對既“厚淨密”！係深黑而有量場感既背景，比 Z1R原廠線效果仲要更黑更淨，如果話原廠線仲僅有微細既線粒噪感，去到Titan就係完全既淨場感！

再上一個層面，如果Z1R原廠線比出既係“淳厚”，咁 Titan就係“濃厚”，係簡單直接而無音染，係質上，仲要多咗一份澤潤！塑造出來音像有質有量，但係又唔似得Cobalt + SE846果種就快要“彈出來”既肉感，係自然耐聽得多！Titan 以銀材料為主體，出到澤潤音色而無“明刻”感，係超出小弟預期！

Titan比出既“濃厚澤潤”，相對於Z1R原廠線既“淳厚悠盈”(同時亦係“恬深淨密”)，C兄係咪已經可以領會到小弟想表達既意涵？再講白d，前者係以“濃厚”為主導，係一份“返樸歸原”既基本架底，無多餘造作，內功深厚者是也！後者以“淳恬”交融為主導，創造獨特悅耳音色！完全係兩款味道！

無比較好難突出繹明，比較完又會覺得係蘋果同橙既故事，面對Titan比出既實力表現“濃厚澤潤”，小弟其實巳經陷入高危境地，只係表面冷靜好似遮蔽咗內心果團火！

內斂自若

繼續提升層次，話說歷時一個半鐘既品聽期間，Titan由始至終，出聲都無咩變化，或者應該話，變化並未能被小弟容易感知，說明出廠前既預先處理“煲線”有一定既效果。

其實小弟想講既係另一個層次，Titan始終都係比出一種“穩淨”氛圍。呢種“穩淨”感，本身帶有一份內歛既個性，進一步體現出 Titan自若本質！俗語既講法就係“定過抬油”！

係實際既表現上，如果Z1R原廠線係高動態，迅態可以接近臨界爆拆，咁Titan就有一份好強既張力連繫，流暢貫穿整體音場空間及各體音元，無嘢可以獨自越軌爆走！

C兄或者會問，小弟咁樣講法，Titan係咪無咩個性，得個悶字？好明顯唔係！小弟想表達既係一種“內斂自若”，豪無花巧，實力派出聲運走丹田氣！係一種絕對實力既氣場，唔係，應該更似係一份“王者氣度”！

綜合考量

Titan兩條線材之間既效果分別又如何呢？Titan-Ag係一種稍為向外擴張，亮麗些少既演繹，Titan-Au就相對含蓄，仲未完全放盡感覺。小弟對佢地既表現其實都有一定預期，以鋼磚 + Z1R組合當前聽感，似乎真係兩者之間取均衡會更合適。

事實上，官方對Titan-Au及Titan-Ag既標示，前者偏重中低頻，後者偏重高頻，唔難理解Titan-Ag+Au會有一定市場需求！除咗實際效果匹配上既需要，入手Titan線材亦可以算係一項投資，好自然同時亦希望有一定既普遍適用性！即係話呢，玩既同時，都係盡量唔好側得太偏，盡可能留些少彈性！

好明顯，如果今日要入手Titan，小弟既感性同理性都一致認定就係Titan-Ag+Au！

黑膠韻味

小弟後期先發現，原來Titan調音取向具黑膠唱碟韻味，引述其中說明：

調音的取向是極具黑膠唱碟的韻味，聲音非常有音樂感，具細節及還原度，中頻密度高，低頻彈性十足。

話說小弟出來威時巳經係數碼時代，對黑膠韻味基本上係零體驗！雖然小弟唔係黑膠玩家，印像中既黑膠韻味，會唔會應該就係“濃厚澤潤”？“濃厚”係主導？而且因為“極密”充滿磁性張力！

如果前文展述既效果就係有黑膠韻味，又係為“痴”黑膠韻味而來，就唔應該純粹以紙面上既技術性均衡及普遍適用性作為決擇準則，唔好就咁想，信自己對耳，試過先再講，一切係耳聽為實！

試聽小結

Titan線材好明顯係有自己既定位，天生就係要獨特不平凡！小弟話自己陷入危險境地，唔係因為Titan是否“痴線”，純粹係Titan完全與當前Z1R原廠線效果既非常差異，而且別樹一格，更加引起小弟希望同時擁有兩款唔同效果風格念頭！更何況黑膠韻味，本身就係一個經典，同小弟既“經典試聽大計！”，係合哂嘴形！

小弟極速完成Titan試聽口水文，表現非常理性，而且大義凜然，又話平常心境？又話唔好玩咁偏？之前又出文大大聲話要揾“痴線”，話明痴線就緊係鈎起條痴根非理性中毒！係咪自相矛盾？點樣自圓其說？

小弟自問自答，睇吓C兄滿唔滿意。首先，“痴線”者，係可遇不可求，唔係你想你揾就有！更重要係，小弟唔知道自己仲有無痴根可以被鈎！再講，平常心境，盡量唔好玩咁偏，同搵“痴線”其實係無衝突，而且應該係恆常守持！

再呼應返小弟開始時既問題，究竟試聽Titan小弟有咩得着呢？睇口水文到呢個位，C兄大概知道，小弟覺得自己唔係揾“痴線”，其實係揾緊fun樂趣！