Acoustic Revive RR-888

又多咗件玩具，今次係玩“腦放”！RR-888舒曼波超低頻產生器唔係新奇，不過效果因人而異！

試玩咗RR-888一日一夜之後，決定換走跟機開關火牛，入一隻15W細功率前級訊源用既低噪12V 線性電源(LPS)，專門服侍配合使用，進一步提升效果。

小弟本身對晶晶石石既感覺非常敏感，見到呢種產品好自然就要試玩，有三方面既期望，關於品聽音質， “一體臨場”及睡眠質量。究竟小弟得到咩感受，咁快換火牛加碼？

話說RR-888入手之後，小弟心急即刻開箱，就咁放係office枱面，見到佢著燈，又好心急咁開著部iBasso DX220 Max鋼磚及戴上Sony IER-Z1R，睇吓對品聽效果有咩即時影響。結果係，無即時影響，或者係細微到小弟察覺唔到，係唔係買錯嘢交學費？

事情既發展當然係無咁簡單，RR-888及鋼磚就咁一路開住成個下午，小弟近距離對住佢4個鐘，間中戴上耳機偷聽一陣，聽感似乎無咩大分別。幾個鐘過去，小弟既精神同身體就出現變化，好似比平時攰，精神鬆弛，有些少睡意，身體內部亦有些少異常，小弟配戴或接近新水晶礦石亦有類似反應。

會唔會係一時心理作用？一返到屋企，將RR-888安置係睡房成晚開著，再試聽感都唔覺有特別異常。反而果晚真係特別攰，好似鬆散咗，無咩精神，好想瞓覺。又對住佢8個鐘，第二朝起身有些少頭暈，繼續試聽，結果都係無咩大分別。

一直去到下午，小弟決定認真些少，戴住鋼磚同耳機走出走入睡房十次八次，對比聽感，今次似乎有多少唔同，係低音既橫向擴散有收斂，下潛亦無咁硬衝，音像亦提升密度凝聚感，程度10％左右，唔算好明顯，要去留意先聽得出，至於其他特性就未有可察覺變化。

對於第一日既試用，雖然音質變化唔明顯，小弟都有一個結論，RR-888的確係有作用！似乎係對小弟既身心作用更多！對睡眠有幫助，肯定唔係心理作用，唔止攰暈，同時係一種感覺得到既身體內在反應，至於咩反應，小弟唔詳講了。好似戴水晶咁有一個磨合調整過程，唔通可以打通小弟任督二脈，天人合一之後，就聽到更好效果，有冇咁玄？

講吓笑，睇來無咁神奇！由於擺放位置亦有影響，需要多些少時間試驗，小弟亦準備長期放置係睡房，基於對自己好一點既出發點，用多幾百蚊入埋平靚正LPS配合獨立使用，希望接收到更純淨來自大地既訊息！

RR-888入手一個星期，小弟收貨入埋隻LPS，比佢地先行一日一夜熱身穩定吓。LPS額定值係12V，行咗幾個鐘之後有些少偏移去到12.2V，得閒先開蓋微調校準，其實＋0.2V偏移都唔太緊要。好啦，一日一夜之後，有無效果？有幾大程度變化？

效果真係明顯好多！首先係小弟對咗佢地一晚，感覺更加攰，係睡房直頭淨係想瞓覺，唔想做其他嘢！到咗第二日，小弟先再認真對比效果，同樣係手持鋼磚，走出走入睡房十幾次，結果呢？

感覺“好聽咗”！整體效果更有音樂感，由相對“沉重粗粒”向“輕盈細膩”轉移，人聲方面亦更有韻味！小弟用黃金六角做對比，其中既The Greatest Showman，原本覺得有些少吵耳，都變得舒服耐聽，非常明顯！用一個數字做衡量，有40％既變化！

小弟既結論係，如果入手RR-888，一定要加多幾百蚊配埋隻LPS，佢既性能先可以盡量發揮！當然，最終效果因人而異，小弟好彩感受到明顯變化！

待續 .....