iBasso DX220 Max鋼磚入咗手幾日，第一次試携出街，未有合心水收納盒，直接手握體驗，對小弟來講係可行既，不過實際操作上好唔方便，肯定唔適合所有用家，所以基本上唔建議流動使用。
鋼磚既身栽體積，係唔適合女士及手形小既用家。小弟手握其實覺得有些少勉強，單手握持感覺唔穩陣，如果人多逼推一下，好容易就會鬆開鋼磚跌地。鋼磚隨身流動時，用雙手握托係胸腹前面，盡量減少單手持握時間就安全好多，手亦無咁快攰。
實際操作方面，小弟覺得電平器及耳機接頭向上，以慣用有力既右手握持係最穩陣方便！一方面電平器外向方便左手調節，耳機線亦可向下用母指夾貼機身，可惜鋼磚係Mango OS模式未有提供倒轉屏幕顯示功能！
話說小弟原本想入一個Pelican 1060貼身細硬膠盒方便流動携帶鋼磚，但係想深一層，咁只能掛腰而且太墜，唔知想點咁，如果真係隨身流動，同直接手握鋼磚無咩分別。最終小弟入咗個唔大唔細既Pelican 1200手提箱，仲可用加帶掛肩膊，一次過放哂鋼磚，Sony IER-Z1R 及Shure SE846耳機及線材，轉接頭及外置電池，成個套裝真正可携。另外一方面，係屋企時亦可以做防塵防濕集中保護收納，一箱多用。
相關文章
沒有留言:
發佈留言