煲機煲線(RUN IN)

雖然小弟比較鍾意自然品聽過程“煲機”，體驗其中過程變化，但係如果可以得到更好效果，不妨同時配合一試“煲機”音頻，引兩段係Youtube上既相關音頻比大家參考試用。

小弟同時想分享一吓自己對煲機煲線既睇法。坊間有好多相關討論既話題不外兩方面，其一，認為煲機煲線效果係“腦放”關係，純粹心理作用！其二，認為唔值得花費銀両投資煲線機或類似所謂“煲線神器”，對相關產品效果提出質疑，甚至認為係偽科學，純粹市場詐騙案咁話！

求是精神

首先，小弟想提出一個基本信念，就係“實踐是檢驗真理的唯一標準”，大前題一定要“耳聽為實”，如果連自己對耳都唔信，一切探討既基礎就不存在，只會淪為無結果，浪費時間，各自各說既爭論，即係話可以散場，唔使再講嘢！

先討論“腦放”問題，根據小弟個人經驗，絕對係存在心理作用部份，心情係會影響品聽體驗，係不爭共識。關鍵係“腦放”影響力有幾大，可唔可以盡量減低？如果存在求是精神，通過系統性比較分析，答案係正面。已經唔係有同無既問題，係有幾多既問題，聽唔聽到既問題！小弟認為，以“心理作用”為理由，一句“幻覺來既”，就完全扼殺煲機煲線既效果，係不能成立！

開放心態

跟住評論一吓煲線器。首先，小弟無意去分析佢地背後既科技，更無能力評價佢地係唔係偽科學。但係，同樣有一個基本原則，小弟相信有麝自然香，好嘢經得起時間考驗，自然會有市場，保持開放心態，聽過先再講，一切耳聽為實！至於值唔值得花銀両投資，用錢買時間，睇應用，睇能力，無話一定錯同對！

講開神器，各式其式，最勁話識得先做狀態分析，再針對線材不足之處，進行煲煉達到最佳效果，仲有煲線服務話要專人“睇火”，控制火喉，文火猛火返復煲煉，好似講到既，都玩得出！有幾多係堅料，有幾多純粹吹水，都係要靠自己塊照妖鏡，耳聽為實信自己對耳！

小弟爬文做咗些少功課，煲線機有專業級Nordost Vidar2，Telos QBS(用到量子咁既名目，又好似誇咗些少)，用家級Audiodharma Cable Cooker，Blue Horizon Proburn，到迷你型一千幾百都有交易，亦有DIY者去鴨記入個影音player配埋個amp仔，接埋負載電阻日播夜播又掂！正所謂天下武功，殊途同歸，未成正果，只係時晨未到！

煲煉策略

先講煲線，應該係可以進取大膽些少，相對有機會造成損害既風險係低，所要注意係要配合轉接頭，接線方向及電流控制問題。至於煲機，最好都係採用保守策略。

當然，如果只係用最傳統可聽範圍話音訊源，正常音量(或略低)，文火推煉，幾乎係零風險！時間比較長，最少講緊幾百個鐘，但係可以體會其中變化過程，亦係一種樂趣！係呢方面，小弟認為一個高質訊源，即係高密度高動態表現者，係至關重要！

中度風險者，小弟亦會嚐試用本文既煲機特殊噪音訊源，作為試驗同輔助，但係每次都係唔會用超過4個小時(半日)，同時注意調細音量，仲要不時返復檢視效果。

煲線神器

至於煲線神器，賣點係懢時間，可以用超低及超高頻，相對較高電壓同電流，用“猛火”煲幾日，好過傳統文火煲聽幾年咁話！小弟自己未玩過，無從證實，短期內唔會考慮，暫時亦唔覺得有咁既需要。當然，如果日後小弟真係玩大咗，亦唔排除有機會入翻一台Audiodharma Cable Cooker！