經典試聽大計!

AudioQuest DragonFly Cobalt - 直白無染恬淨美麗

當TAKUMI II遇上SE846

Sony NW-WM1Z 試聽初感

2020年8月23日星期日

Sony NW-WM1Z 試聽初感

話說小弟自N年前入手AK100之後，一直都好忍手無再入過DAP，不過近期又準備試聽一隻DAP，想體驗一下市場當前代表性DAP既性能及效果，保持些少神秘感，唔講邊部DAP，叫住佢X DAP。

會唔會試一試又中招呢？點都要先同AudioQuest DragronFly Cobalt既效果比一比！小弟主要都係試聽感為主，分兩部份，首先係限制係44.1kHz各方面既基本表現(黃金六角)，其次係無任何限制既盲聽。另外，亦會比較一下平衡及非平衡輸出效果差別。

耳機用Shure SE846(小弟亦會用Sony IER-Z1R試配品聽)，接線係TAKUMI II(2.5，4.4[2.5]及3.5[2.5])，X DAP推SE846配TAKUMI II同用Cobalt推既效果對照，會唔會贏九條街？一條街？要影相分勝負？定係各有千秋？係咪物有所值？

小弟試完分享聽感之後，C兄就可以一齊玩，估X DAP既真正身份 ......

熱戀金磚

小弟話要同C兄一齊玩估一估X DAP既真身，點解咁快就唔玩，未品評就直接講咗身份出來？

話說小弟昨晚第一次同金磚(Sony NW-WM1Z)約會，一上手馬上就係一個大驚奇，再埋身試聽咗半個鐘之後，就係一個大大驚奇！小弟恍然大悟，點解佢叫“金磚”，點解授以“Signature Series”之名！小弟同時覺得，Sony官方係玩緊一個不一樣既“玩味”市場策略！

經過同金磚既玩味體驗，小弟就知道自己遲來既馬後砲品評，一出聲就會即刻被估中，玩猜猜我是誰已經唔會有趣味，小弟亦要改變一下文風，用玩味角度去品評金磚！

首先，就係佢超乎想像既重量，小弟一攞金磚上手就即時叫咗一聲！因為手掌突然凌空墜落咗幾吋！店長及同場玩家用大驚小怪既眼神同語調安撫小弟，“佢係咁重架啦！”，係驚訝之餘，小弟有意識地要握緊手上既金磚，驚死會唔覺意跌咗佢落地！

金磚咁既體重，真係帶住一塊磚石係身上，配埋條ALO Audio Gold 16 (Gold 32)，隨時可以扮土豪聽歌，突然用金磚襲擊其他人，出其不意攻其無備，暗殺武器榜第一位既摺櫈，都要退位！的確會打擊一部份潛在買家既入手意慾！

再來，金磚一出聲，就係驚死人唔認得佢咁！唔係話佢大鳴大放先聲奪人，相反，係一份出奇地“溫柔”，唔止溫柔，係溫暖，都唔止溫暖，直頭就係熱暖！好明顯，小弟手上既金磚，正在發光發熱，從外到內，再從內到外，要熔化小弟個心，從熱暖變成“熱戀”！

黑金策略

小弟繼續聽感品評之前，例牌又要吹一吹水，事後孔明一番，幫自己抽吓水。如果話金磚擺明係玩味者，咁黑磚(Sony NW-WM1A)玩咩呢？係着重純音質還原，玩“直白”者，不過從陰謀論角度分析，唔係，應該係叫市場策略，黑磚其實係執漏包底者！

黑金雙磚，其實係Sony既吸金連還殺着。潛台詞係，最正最靚最好聽既已經放哂入去金磚，你信Sony就得啦，唔使講咁多嘢！個邏輯好簡單，一句到底，“Like唔Like？”，Like！即刻進貢，相金先惠！唔Like？唔緊要，黑磚一定合你心水，都係相金先惠，乖乖進貢！黑金雙磚就咁一時無兩，威震江湖！講錯，係威震市場先真！

小弟用咗咁多口水“識穿”官方策略，當然係又想讚吓自己聰明智慧。其次就係想做個預期管理，強調品評金磚既時候，先要將自己既層次最少提升兩檔，着重整體韻味氣氛既演譯，唔好一味專注係三頻，分析力，空間，音場，人聲，樂器等等個別特性，因為去到金磚呢種“玩味”既級數，其實就係“Like”同“唔Like”咁簡化咗既問題！其他既理由，都已經無咩大意義，只係會淪為做選擇既籍口！

試聽金磚一開始時，小弟係用咗“黃金六角”模式，不過幾分鐘之後，小弟已經意識到要修正，就進入盲聽模式，繼續品味金磚 ......

開陽淳厚

其實小弟品評金磚呢類玩味產品，係好合適既，因為小弟從一開始就係追求一種意像既平衡“一體臨場”，特別着重感性意境，並非完全絕對音質追求。回應金磚既“玩味”，呢一章小弟全部借用意像投射既方式去表達聽感，為咗得到更鮮明既意會，小弟同時以Cobalt既效果作為對照，希望C兄仔細體會其中味道！

如果金磚係“天使淑女”；咁Cobalt就係“魔鬼索女”。如果金磚係“開陽淳厚，端莊樸實，悠撫心扉”；咁Cobalt就係“恬淨美麗，玲瓏浮突，拘人心弦”。如果金磚係“Killing me softly”；咁Cobalt就係“Can't live without you”。

越聽越愛

金磚既設計初心，就係果種“越聽越愛”者，佢唔走“直白”而走“玩味”係非常明智。睇得出，金磚既用家市場係非常有針對性，包括咗土豪，忠實粉絲及嚐味玩家(排名不分先後)。總之最後目的，就係係你進貢既同時，亦要你愛不惜手，金磚常伴左右，間接又為Sony賣廣告，一石多鳥，簡直無得輸！但係，話又說回來，世界好現實，應該話，要成為經典，背後要靠真正實力支持！

就小弟試聽既金磚Demo機效果，最明顯既第一感，係一種類似“琥珀”色既背景“色染”。再形像化既講法，睇一下本Blog文所引用既一張官方“金磚在手”照片，就係果種色溫，果種背景，果種氛圍！

另一方面，通過背後強大控制力既作用，就係一份“淳”化，最終體現出既聽感，係一種厚而輕盈，有層次質感既悅耳悠，開朗又無散拆感，就係小弟上一章對金磚既初感“開陽淳厚”。

如果一開始可以接受金磚果種“色染”，又喜歡“開陽淳厚”，再體驗其中意像，咁金磚極大機會就係“越聽越愛”既選擇！

橙與蘋果

雖然話品評金磚要用高層次方式去“品味”，小弟試聽金磚其實有另外一個目的，就係同Cobalt對比，確定一吓Cobalt既實力。C兄可能已經知道，小弟今次又表錯情，到試聽果刻先知道金磚其實係“玩味”者，就算要比，都應該搵黑磚“直白”者砌，擺明係搵錯對手！

無論黑磚或金磚，軟硬件及擺上枱面功能都已經嚇死人，邊有得比，自欺欺人！仲有，佢地着眼既市場目標唔同，設計既針對性亦唔同，又係橙同蘋果既故事，浪費時間！

呢個世界有樣嘢叫“盲聽”，只要係可以重播出聲既，都可以比一比。上文小弟已經係意像方面做對比，係完全唔同既風格演譯，金磚同Cobalt用一個字概括，就係“淳”與“恬”。

再進一步，係整體空間及音場方面都做一個對比，兩者都係“宇宙”級既空間感，不過，金磚行4.4平衡，就算Cobalt只係得3.5非平衡輸出，Cobalt既背景都係“更黑”。係音場方面，金磚比較開闊，Cobalt就比較有穿透性既深度感。

網上有品評話金磚音色有“膽味”，就小弟當前所得聽感，暫時未能認同。雖然金磚有“開陽淳厚”，形似膽柔，但係缺乏迅態“氣動”及“能量場”係空間穿透感，係呢方面，甚至同Cobalt既效果比，仲有一段明顯距離。金磚應該唔止咁既能耐，小弟認為係試聽既Demo機Run in時間未到火喉！

試聽小結

小弟唔係做緊產品推介，金磚所用到既黑科技就唔係呢度講啦，只係想再補充，金磚既強大性能，小弟未能係短短三十分鐘既試聽裏面一一體會，所得聽感只可能係對金磚片面既主觀評價。

最後，希望有機會品聽開聲1,000小時或以上既金磚，據聞效果有明顯分別，小弟可以嚐味金磚真正實力！

後記擇錄

小弟之後入手Sony IER-Z1R耳機，準備煲煉三幾個月，再去體驗一下WM1Z + Z1R既實力，同時對比Cobalt效果，再次品評佢地既真正身價！

相關文章

AudioQuest DragonFly Cobalt - 直白無染恬淨美麗

當TAKUMI II遇上SE846

Sony IER-Z1R 經典信使

AudioQuest DragonFly Cobalt 第一章: 恬淨美麗

2020年7月23日星期四

AudioQuest DragonFly Cobalt 第一章: 恬淨美麗

小弟眼球最近比流動型DAC/ Player吸引住，剛剛入手咗AudioQuest DragonFly Cobalt，聽咗未夠一個鐘，第一感係“風和日麗，行雲流水；心誠意悠，直白無染；鬆容大氣，游刃有餘”......

小弟專用既攞你命“CoTak846”(DragonFly Cobalt + TAKUMI II + SE846)，終於研究成功，問你死未？！出住毒圖，之後再慢慢補文。

捉藍蜻蜓

小弟由發現入手Cobalt，到順利出聲，前後唔到2日，其實中間要有準確判斷，經驗及洞察力配合，要解決幾個思維束縛及技術性問題。而家咩都話Plug and Play，話就係咁講，現實當然無咁簡單同順利。C兄如果都想係手機玩Cobalt，唔好學小弟咁猴急，事前要做一輪功課，最重要係試清楚同手機系統既兼容性，連接線材轉換，仲有手機軟件配合同優化。咁當然，最重要既係，啱唔啱聽，千祈唔好流咗血先來後悔！

小弟自我抽完水之後，就入番正題。首先加上Cobalt之後，其實巳經係一個全新系統，原來係手機既DAC及AMP部份，巳經被Cobalt取代，配上TAKUMI II及SE846之後，合體變成CoTak846既預期品聽效果，肯定係完全唔同。不過，又係出乎小弟意料之外！當小弟聽到Cobalt出聲果一刻，就馬上決定要捉住呢隻藍蜻蜓！小弟既第一感，巳經係前一章透露咗，其實唔單純係音質，而且係一種似曾相識既味道！

小弟同Cobalt之間既結緣關係，對比類似市場產品及Ztella試聽，請參看另文AudioQuest DragonFly Cobalt 第二章: 眾里尋他。

直白無染

係繼續之前，小弟要係手機裝一個播放器軟件，請參看另文AudioQuest DragonFly Cobalt 第三章: 先利其器。跟住終於到咗試聽Cobalt既時刻，有咗手機3.5輸出及之前Ztella既效果打底，Cobalt既表現就更容易對比。

試聽係用手機(華為Mate 20X)USB C接口，經原廠USB A去C既DragonTail轉換線，再接到Cobalt，耳機線TAKUMI II就接到Cobalt既3.5輸出插口，耳機係SE846，成個組合小弟比個簡稱CoTak846。播放器軟件係手機上既UAPP，作獨立USB DAC驅動。

當小弟聽到CoTak846既效果，唔可以話係驚喜，應該叫驚奇！首先，以Cobalt既身價，就算最近係減咗價，都比其他產品高出一倍或以上，一隻Cobalt就可以買起四隻Ztella，預期佢出高質既音頻效果，絕對係理所當然。

所以“奇”者，係小弟預期Cobalt會好似Ztella咁，比出另一種明顯“性格”，畢竟佢係一個完全獨立既DAC控制，點都要有返d自己既獨特性，但事實完全唔係呢回事！聽咗CoTak846頭幾十秒，點解係聽緊手機3.5輸出既效果？！無錯！奇就奇在 ......

最初，小弟以為係連接出錯，接咗手機3.5插口未轉去Cobalt。無接錯，藍蜻蜓着咗燈，出緊聲，心裏一沉，一樣聲既？！回魂醒一醒，細心再聽落去，唔同，係好唔同，比自然更自然(相對手機3.5輸出)！如果硬係要比出個形容詞，就係“直白無染，鬆容大氣”！一種“游刃有餘”，強大控制力量係背後發功！

原來，小弟一開始就表錯情(好彩無七日咁耐)，Cobalt所體現既唔係獨特“性格”，而係完勝既“實在感”！唔怕貨比貨，最怕唔識貨，係CoTak846面前，手機出3.5效果，就即刻變成相對地“鬆散空洞”；Ztella既性格，就即刻變成相對地“漂移浮染”，突然醒覺懷疑人生，所謂既“用家”級同“玩家”級既分別！

咁CoTak846既初感效果屬於小弟標準邊個級別？聰明既C兄應該係心裏有數啦，呢個組合開聲時間尚短，小弟聽番兩個星期之後，詳細聽感將係另文“當TAKUMI II遇上SE846”，一并比較展述。

聽過CoTak846既效果，完全體會到經典者，精益求精既一份“心誠意悠”！小弟頓然心生幾分敬佩！激發咗好多感想！實際使用及手感方面，請參看另文AudioQuest DragonFly Cobalt 第四章: 使用感想。

剛陽緻密

CoTak846大約品聽咗十個鐘，小弟急不及待要報告一下聽感進度，因為小弟又得到多一個驚喜！同幾日前Cobalt初試音時相比，SE846表現既效果，可以用“爆裂”利刃開封來比喻！呢十個鐘用Cobalt“推煲”所得到既成果，要比一個月以來用手機3.5推動SE846既成績好太多！

又係一個層級式既跳躍，又再一次證明，一個優質既DAC訊源，對耳機既“煲開”係幾咁重要！小弟完全感受到Cobalt既“剛陽緻密”，極高動態底氣，一直“衝擊”緊SE846及TAKUMI II，好似要完全打通佢地經脈，將所有膜糊紗層徹底撕破！

睇來，小弟應該可以係CoTak846呢個組合上面得到“一體臨場”終極效果。如果手機3.5係差臨門一腳，因為近視瞄唔準龍門，所以射極唔入！CoTak846就係巳經對準龍門，十二碼定點射門！C兄可以理解，兩個效果之間既距離！

終極訊源

首先，如果小弟只係單純需要一個流動播放系統作為日常消閒品聽，跟本就唔使再入手Cobalt，當前既SE846配上TAKUMI II後，用手機3.5推出既“感動”效果，已經可以完全滿足小弟需要！Cobalt對小弟來講，係有特殊意義！

無錯！Cobalt將會係小弟以後試聽各種系統時，作為一個共同訊源，品聽各種耳機，AMP，線材仍至系統其他部件效果異同，就更容易有統一及更準確對比品評！

DSD，平衡輸出，更高分析力 ...... 小弟都想要！不過，魚與熊掌不可兼得，聽過Cobalt係局限範圍中既“極致優化”效果，小弟選擇咗Cobalt既完勝音質！更何況，Cobalt一開始設計既定位，就係作為一個優質USB DAC Pre-AMP訊源，正中小弟死穴！

至於值唔值呢個問題，Cobalt與同門Red版既爭論及比較，參看另文AudioQuest DragonFly Cobalt 第五章: 性價審評。

極限挑戰

係最後高潮聽感分享之前，小弟繼續吹一吹對CoTak846既應用及期望。上一章，小弟提到會將Cobalt作為一個“共同”訊源，作為以後品聽系統各部份，特別係耳機及線材效果，做對比就方便容易，而且評價仲會準確好多。

雖然Cobalt係市場上定位獨特，小弟並唔擔心佢同耳機之間既匹配問題，官方自己拍哂心口承諾，10歐姆阻抗或以上，甚至係最低效率耳機，Cobalt有2.1伏特輸出，係難唔到佢咁話！小弟隻SE846得9歐姆，掂唔掂？聽感就話，好掂！點樣掂法？注意下文詳細聽感分享。

係小弟之前發現Cobalt“剛陽緻密”特性“煲開”SE846之後，就有一個直覺，如果用佢推之前試過既ALO Gold 16(另文: ALO Gold 16初感)，效果可能完全唔同。如果品聽幾十分鐘之後，就比Cobalt“爆開”，會唔會當時就入手咗Gold 16？TAKUMI II就唔會出現係小弟呢個系統？如果今日再重新選擇，Gold 16同TAKUMI II都放係面前用Cobalt推，小弟應該都會係選TAKUMI II，唔難理解，因為Gold 16配SE846，就算效果真係“開闊”咗，仍然會係“過熱”！

小弟又有另一個直覺，Cobalt推其他耳機，特別係出咗名難服侍Sennheiser耳機，甚至係大耳牛HD800，應該都掂! 有網上評論就話，唔好比Cobalt手指型外表誤導，如果合埋眼，你會以為係聽緊桌面Hi-Fi系統！小弟必須承認，當前CoTak846所得效果，的確係聽過最有Hi-Fi感既體驗。

另一方面，又忽發奇想，其實都係好自然既推想，小弟呢套CoTak846剛剛到達萬元級既“超輕便”系統，同市場當紅，二萬三萬旗艦級手提DAP(仲未計耳機及線材)，有無得揮？雖然話呢個又係一個橙同蘋果比較問題，係Cobalt絕對領域結界，限制係24bit/96kHz分析力，就算係無任何條件限制既盲聽，可能都要聽過先知 ...... 總括而言，有咗Cobalt之後，小弟既品聽世界係廣闊咗，係實際行動上，小弟就可以更積極系統化品聽各種產品，提升唔少樂趣！

好啦，CoTak846既前奏吹水文巳告一段落，跟住下幾章文，就係聽感最後高潮部份！預告，可遇不可求既“一體臨場”體驗其實巳經出現咗！小弟會將呢分喜悅毫無保留咁同C兄分享，精彩內容包括，“一體臨場”，“從密開始”及小弟對CoTak846最後既評價“恬淨美麗”！

小弟對Cobalt進一步既既深度體驗，及相關優化調整，請參看另文AudioQuest DragonFly Cobalt 第六章: 深度體驗。

後記擇錄

小弟之後入手Sony IER-Z1R耳機，配上Cobalt效果更精彩，直頭一聽難忘！另外亦同Woo Audio WA11 Topaz做咗一個對比及Cobalt評測，參看看另文AudioQuest DragonFly Cobalt 第七章: 實力評測。

相關文章

AudioQuest DragonFly Cobalt 第二章: 眾里尋他

AudioQuest DragonFly Cobalt 第三章: 先利其器

AudioQuest DragonFly Cobalt 第四章: 使用感想

AudioQuest DragonFly Cobalt 第五章: 性價審評

AudioQuest DragonFly Cobalt 第六章: 深度體驗

AudioQuest DragonFly Cobalt 第七章: 實力評測

當TAKUMI II遇上SE846

Sony NW-WM1Z 試聽初感

Sony IER-Z1R 經典信使

2020年7月2日星期四

當TAKUMI II遇上SE846

如果你唔相信有緣份，如果你唔相信有一聽鍾情 ...... 一定要追睇剛剛發生係小弟身上既事，係幾咁令人驚喜，難以言喻！

有緣有份

如果之前ALO Gold 16(另文(ALO Gold 16初感)係“無緣對面不相逢”，咁TAKUMI II就係“有緣千里能相會”，係事前豪無預期下，得到美好效果，就係驚喜！

話說小弟昨日收工之後，又出動獵艷。今次去咗個老地方，一口氣就話想試聽三條IEM線。店長見到小弟有備而來咁有誠意，又知道小弟想推隻SE846，就介紹TAKUMI II，話會比小弟自選果三條線既效果更好，TAKUMI II就係基於SE846做調音對象咁話！

TAKUMI II小弟之前聽都未聽過，完全唔知佢係咩料咩品相(其實係小弟自己孤陋寡聞！)，更唔好話有心想試聽！對店長推薦係半信半疑，係咪想hard sell？事後先知，原來TAKUMI II真係比小弟既自選試聽線要高檔一個系列。既然一場來到，店長又出到聲，無理由唔試埋佢，就算係要十萬九千七，聽完先再講！

點知一試咗就真係放唔低，名符其實既驚喜，一路戴住聽住沿途返屋企。小弟本來想獵艷，反而自己先變咗被獵者，就咁死咗比TAKUMI II，雖然又出咗血，但係個心感覺好甜，真係抵死！

究竟TAKUMI II配SE846既效果有咩咁特別？！可以讓小弟有咁大驚喜？！小弟之前又選咗邊幾條線試聽？

高質要求

首先，小弟要吹一段前奏，之後再繼續就更容易理解後續內容。小弟係有要求之人就係C兄都知啦，最近入咗SE846用手機直推既最簡約系統(另文SE846 - 經典之選)，原廠線既表現比小弟預期要好，可以去到自然“舒服”效果，係相對動態噪雜背景既流動環境下，其實巳經達到基本要求。

當係室內坐低靜落來既時候，就希望系統可以有更高質量輸出，依小弟既標準，最少可以達到“欣賞”級別(再上係“感動”層次，及最頂級既“一體臨場”效果)。老實講，係無獨立DAP或AMP既情況下，用手機直出，小弟都唔敢設定太高期望。

另一方面，係達到一定輸出品質水平既同時，小弟希望有廣泛既適用性，可以作臨時品聽各種其他訊源，特別係其他不同流動系統，SE846既高清均衡，適用性親民，就係好合適選擇。咁又點少得一條有番咁上下質量，又要易推親民既連接線呢？就係咁，小弟一路品聽煲住原廠線既同時，騎牛揾馬，尋找配得上SE846，又有合理性價比既真命天子 ......

候選線材

係尋線既經歷，自從之前試聽ALO Gold 16因為新線未能完全體驗佢既性能之後，小弟今次特別選咗同一間廠商出品不同特性線材品聽，據稱佢地線材出廠前都經過特別“煲線”處理，當用家品聽時，就可以讓線材盡快進入最佳狀態。

小弟做咗一輪功課，綜合特性及價格資訊之後，選咗三條線品聽，分別係Silver Galaxy II，Silver Galaxy Mix II及SuperNova III，全部係8芯版，依三頻響應高低特性排列，TAKUMI II當時並未在選擇之列，佢地既詳盡規格就唔係呢度重覆講啦。

講開線材，小弟有感而發，而家動不動就6N OCC，又銀又金，又有多種處理提升效果，咪話地球唔係轉緊，物料質量及科技不斷提升緊！小弟自選幾條線都話係入門級，咁原廠線咪就只能算係線渣？！另外，性價比呢樣嘢，有時可以係好主觀，最終都係兩大決定性因素，銀彈實力及“聽得到幾多”之間取得平衡。

坊間有一種建議，話可以用耳機一半價位作為入手升級線材既“筆直”。小弟覺得都不失係一個起始既參考基點，然後再作性價比最大化選擇。當然亦要有所變通，彊硬死守住個價位，有可能錯失良緣組合。如果升級線係耳機一半價位及同等價位之間作為選擇區間，可能比較合適。

鹿死誰手

小弟自選既三隻線材，係銅及鍍銀芯線比例應用唔同之外，編織方法類同，佢地之間效果雖然有差別，但會比較連貫，話哂係同廠同一個級別，就唔會出到一個天一個地咁驚嚇。小弟咁樣選，其實係想容易係佢地之間做對比。

根據小弟預期，一開始其實係睇中咗Silver Galaxy Mix II，相對齋鍍銀線及純銅線，小弟係傾向選擇不同線材混合絞織，出發點係希望配SE846時，可以盡量保障到均衡效果。依小弟原來計劃，係三條自選線中，其他兩條係做“陪跑”比較，就算最後超出預期，大包圍三選一，點都中一條，一定無死錯線！至於TAKUMI II，就係個另類，打破咗原先小弟既試線品聽佈局。

其貌不揚

講完自選線，小弟就來評一評TAKUMI II既外觀手感。當店長攞佢比小弟試時，小弟先至係第一次見到佢盧山真面，之前連相都未見過。見到實物之後，第一眼感覺似玩具裝飾鬆散花線之類，同札札實實，金銀閃靚既三條自選線比，睇落真係有d兒戲！

最奇怪係TAKUMI II個編織方法，金黑兩組芯線I字並列，再一前一後交替互相牽掛，每一條金黑芯線，又再輪流交替橫向串通整個排列，形狀就好似一條平闊麵條，完全打破小弟心目中絞線既有印象！

又係小弟自己知識貧乏，一d都唔兒戲，事後好奇查料，TAKUMI II質料不但有銅有銀又有金，仲配合一個特別比例務求得到均衡音調效果。據稱，佢呢種編織法亦係大有學問，可以減少外來電磁波干擾，甚至連個Y接位附近粒木珠，都唔係純粹裝飾，而係有吸震作用咁話，設計別出心栽！

小弟無意深究各種用料及編織法背後理據，只重視最終輸出效果，無論係金銀閃靚亦或似裝飾花線，小弟都只會耳聽為實作為唯一標準，請用實力說服小弟，對耳 ......

真命天子

好啦，C兄咁有耐性追文到呢個階段，終於等到戲肉最高潮既部份！四條線材放咗係小弟面前，應該先試聽邊一條？！試聽同樣係用手機(華為Mate 20X)3.5出直推，耳機係SE846，最先亦會以原廠線效果作為對照。

小弟決定先試其中一條自選線打個底，首先係選聽咗Silver Galaxy II，8芯絞全部係鍍銀線材，預期佢既高頻效果有最大既提升，品聽時間大約係十分鐘左右，之後小弟就換上咗TAKUMI II，大概又係品聽咗十分鐘左右。

聽完TAKUMI II之後，小弟就即刻確定要買佢落來。店長見到小弟咁爽快決定，又未聽另外兩條自選線，表情有些少好奇，小弟比咗一句評語，聽過TAKUMI II之後都唔使聽其餘兩條線啦！跟住執拾番好d線就比錢完成交易。

TAKUMI II就係“被選中的線”！點解小弟可以咁肯定？連另外兩條自選線都唔使試聽？聽過Silver Galaxy II既效果又如何？真係無得同 TAKUMI II較量？

星明亮麗

小弟首先報告Silver Galaxy II既聽感。好明顯，廠商出廠前既“煲線”操作，真係發揮咗作用。小弟品聽時，係無新線怯場未開聲既感覺，一開聲就已經好到位。相比原廠線，效果可以用有全面性淨質量既提升來形容，完全可以即時體現線材身價！

既然講得上全面性淨質量既提升，就唔再咁例排逐樣嘢講啦，小弟就以線材之名作個比喻，如果原廠線效果似“太陽系”，Silver Galaxy II就係繁星閃爍既“銀河系”，最少提升咗一個宇宙級數，星明亮麗，清清楚楚，豪不含糊！依小弟個人既品評標準，效果已經講得上係“欣賞”級別。

不過，所謂“成也蕭何，敗也蕭何”，小弟最終都係唔會選擇Silver Galaxy II，其中原因就係小弟預期之內，試聽完就得到確定，係“陪跑”！SE846本身屬性高清，再配上Silver Galaxy II既加乘，中高頻效果係過咗些少火候。

音韻線條，主體輪廓深刻，特別係高頻時，女聲非常突出，原來係大舞台上既表演，好似走近咗對住小弟唱，有些少“唐突放大”，影響咗主體係殿堂原有位置既空間距離及比例感。

依小弟原來計劃，就算係變成“陪跑”既Silver Galaxy II體驗，小弟對SE846配上另外兩條自選線既預期效果，仍然好有信心，必定可以選到其中一條！如果TAKUMI II無出現過既話！TAKUMI II既效果，就係咁讓小弟一聽難忘 ......

從心驚喜

係正式評價TAKUMI II之前，小弟先再補充一下另外兩條自選線既預期效果。話咗一場來到老地方，點解唔用多十幾廿分鐘聽埋兩條線？原因八個字概括，“匠心獨韻，渾然天成”，點出全文主體及驚喜所在，三條自選線未達境界，TAKUMI II獨有者！

正如小弟前文前提及，三條自選線既效果唔同得來又唔會係一個天一個地，係有一定連貫性。Silver Galaxy Mix II四芯銅及四芯鍍銀絞織，SuperNova III全銅八芯絞織，以小弟聽過全鍍銀Silver Galaxy II既效果，完全可以預期其中異同。佢地同樣係“銀河系”級別，所不同者，係星系中星閃亮度及轉移佈局，相信C兄唔難理解小弟作出既比喻。

TAKUMI II既效果的確就係係另一個層次，要再提升多一個宇宙級別，如果自選線係“銀河系”，咁TAKUMI II就系“全宇宙”。唔好誤會小弟所指既一個級別，係線性倍數差距，最少係指數級倍數既提升，係有限與無限既對比，超越音節形相，已經進入“境界”層面！

事實上，小弟試聽完TAKUMI II之後，就即時判定“匠心獨韻，渾然天成”效果，已經達到小弟標準既“感動”級別，係一份從心喜悅，一份甜在心頭，難以言喻既驚喜！試聽完畢當下，就係帖子出咗預告，C兄而家大概可以了解小弟當時“一聽鍾情”既心境！

理性話，聽埋無蝕底! 感性話，驚喜唔好比佢停! 感性贏！試問小弟係當時巳被“感動”吸引住既心境下，仲點會再換其他自選線去聽返“欣賞”級別既效果呢？只會想繼續用更多時間，去品聽了解呢份全新既“感動”喜悅。

C兄如果認為小弟既描述過於抽象，就要繼續追睇下文，小弟比較具體展釋，“匠心獨韻，渾然天成”， TAKUMI Ⅱ帶來既獨特體驗！

配戴體驗

小弟未出詳盡品聽報告之前，先分享一下TAKUMI II既配戴及使用體驗。整條線材既配戴感覺都算得上係舒適，MMCX接頭端既耳托部份成90度角定形弧度，雖未能完全配合耳廓外形，但小弟覺得效果已經非常唔錯。

由於線材比較扁薄鬆軟，係收納時要比較小心，可能因過度逼壓出現“拗柴”情況。另一方面，依小弟男性中等身栽尺碼，感覺線材略短，店長話線長標準係1.2m(原廠線就有1.5m)，當連接手機手持步行前後自然擺動時，手部未能充份伸展，要“就住就住”。係小弟既情況，如果線長有1.3m，多10cm做“緩衝”，一路行一路手持聽就會比較輕鬆自如，唔使咁“手緊心掛”。

小弟係網上搜索發現有人辭官歸故里，本地有兩位用家放售已經改4.4頭既TAKUMI II，證明佢都有一定捧場客。小弟漏夜趕科場，用一排之後，或者日後升級再玩DAP，會考慮改一改自己條TAKUMI II，特別係個Y位透明包膠，改成圓桶形金屬增強屏蔽效果(係貪靚仔多過實際)。

最後想分享一段小插曲，C兄睇圖有無發現，小弟條TAKUMI II多咗d嘢？係多咗3.5L轉頭。小弟原本係想入一條MMCX/3.5配合手機音頻直推既簡約系統，試聽時只有2.5平衡頭版本，店長加咗個3.5L去2.5轉頭再比小弟試線，試聽完感覺良好，小弟最終就決定要呢種接頭方式，入埋個3.5L轉頭。

TAKUMI II用2.5頭(加轉接頭成3.5或4.4)，保留將來接駁平衡輸出系統DAP或AMP既最大可用性，咁樣一條線就可連接平衡及非平衡訊源，及多種中小型插座輸出，唔使因為轉換新系統再特別要改線頭，一次過搞定！

天生一對

小弟繼續詳評之前既前奏，C兄如果有查過官方網頁有關TAKUMI II既三頻響應特性，低頻方面效果係有所提升，中高頻就係中度水平。其實小弟之前一直以為TAKUMI II本身係三頻均衡，原來佢都係屬於有“性格”者。如果單以可見規格資訊，小弟係完全唔會考慮TAKUMI II，因為一開始小弟就唔想揾太有性格，通用性唔強既線材，更何況佢其貌不揚，未能第一時間吸引小弟眼球！

小弟既選擇完全係基於聽感驚喜，先選咗耳機有咗SE846，再有TAKUMI II，呢個組合就算唔係絕配，都係天生一對。小弟越聽就越認同店長係選線試聽時話TAKUMI II係以SE846作為調音對像既講法。而且小弟好相信，呢個組合同時係有好高既通用性，品聽絕大部份訊源，都會有好效果。相對於原廠線既一般動態自然“舒服”日常品聽效果，小弟既要求就自然水漲船高，最少會達到小弟標準“欣賞”級別。

最大驚喜當然係，就咁用手機3.5輸出直推，TAKUMI II配上SE846，可以一下子跳升到“感動”級別，竟然可以泊得住小弟聽過大耳牛配桌面系統既效果！甚至好大機會出現終極體驗“一體臨場”(“一體臨場”唔係絕對音質既追求，係一種相對性既“超級平衡”，係之後詳評文中，會重溫展述一下小弟既要求)，完全出乎小弟意料之外！

後記擇錄

機緣之下，小弟得到Gold 32 (ALO Audio Gold 16 x 2)線材，品聽效果又有另一番新氣象！

相關文章

AudioQuest DragonFly Cobalt - 直白無染恬淨美麗

Sony NW-WM1Z 試聽初感

Sony IER-Z1R 經典信使