經典試聽大計!: Project Move

顯示包含「Project Move」標籤的文章。顯示所有文章

2018年8月26日星期日

Macbook 拯救大行動第四章：心細手巧

話說Macbook拯救大行動雖然已經大結局，小弟始終有感想不吐不快，其實應該話係提醒及建議。首先，文章所述係小弟所處場景個別獨特情況，所有操作仍根據小弟個人經驗及價值取向決定，純屬分享，不可一概而論，小弟亦無意鼓勵C兄仿效！

對大部分Macbook用家而言，都不適宜自行嚐試拆解機體，特別係基於安全及保養考慮，對內部電池(有損壞更要小心)，底板拆解及安裝，如果處理或操作不當，可能會使情況更惡化，甚至發生意外危害人身安全！

畢竟"拆機"對個人心態及技巧上都有一定要求: 膽大，心細，手巧。Macbook算係比較精巧器件，並唔適合新手試玩"拆機"。小弟自小已經喜歡拆拆裝裝，即使對自己信心爆棚，夠膽大嚐試，但得膽大係唔夠既，仍要心細分析部署，再以手巧執行。講就容易，其實係積累咗好多年成功與失敗既經驗，然後可以趨吉避凶，有條不紊走向成功，要成就任何事，幾時都需要呢幾個條件！

一輪廢話之後，最有建設性既提議係: 首先評估壞機係咪有得整/ 值得整，如果係否定，買過部全新既算啦，再依"四電一腦"法例要求，環保回收處置咗件舊機！就算真係有得整(個人既觀點係，將HDD換成SSD，係最值得考慮既部分)，付出合理價錢搵專業人士搞掂，唔使自己拆裝，慳時慳力！除非好似小弟咁，有信心，有能力，最重要係有時間過手癮，視之為休息娛樂！

後記

Macbook重生後運作咗差唔多一星期，基本功能良好，只係個Trackpad仍然有不穩定現象。小弟覺得已經唔係積塵問題，可能係之前Trackpad上既電池發脹，影響咗其中元件。小弟原本想以外置滑鼠取代，不過咁就失去咗慳桌面位置原意。最終更換一個全新Trackpad，維持Macbook一貫形態及可攜性。

拯救ThinkPad

救完Macbook又救ThinkPad?! 唔好誤會，小弟唔係靠救機揾食，只係小弟週身刀，張張刀都有番咁上下，可以算係個通材。小弟呢部舊ThinkPad SL500，已過保養，官方支援亦已經停止。當年係pre-installed Windows Vista，之後小弟升級上Windows 7，行咗5年之後又係死咗電池同炒HDD，與Macbook有類似通病，已經無法boot機。小弟知道ThinkPad既情況係無咁惡劣，換咗電池同HDD，再重裝Windows就可以重生，無發現有散熱問題，亦無需拆離內部底板大清塵。

問題係ThinkPad值唔值得拯救？！上網爬文知道有人成功裝上Windows 10之後，就覺得值得拯救。咁當然唔會抱大期望重生之後要佢做粗重工作，只係要求上網，電郵及用Office做到一般文書處理。

同樣投入咗大約$1,000改換咗3個部件，分別係換上新既環保電池，HDD換成120GB SSD，為咗進一步提升效果，再將原來2GB RAM升級去到4GB。雖然ThinkPad上既Core2 Duo處理器相對落後，更換部件之後整體上應該可以完全達到小弟預期要求，暢順運行Windows + Office！

2018年8月22日星期三

Macbook 拯救大行動第三章：浴火重生

Macbook拯救大行動來到大結局既一章，係多次未能重裝OSX背景下，小弟決定為Macbook做一次硬件偵測，不過diag并未發現任何硬件錯誤。咁問題出現係咩地方！？小弟開始向Firmware方面考慮，畢竟小弟既Macbook已經係2011出廠，網上揾料之後，確定Firmware一早已經過時，而且已知現有版本係有類似起動問題，咁小弟就決定要先更新Boot EFI及SMC Firmware。可惜死機後，小弟自已係做唔到Firmware更新既。

第四步最終開咗個Apple Care case要求升級MacBook Firmware及重裝OSX。去咗最近小弟住處一間Apple Care中心，個服務員聽小弟講咗一分鐘，就接咗小弟部Macbook上佢地部server，跟住Macbook自己行咗成個鐘，自動boot埋機5-6次，就入到OSX，而且係最新版既macOS High Sierra。成個過程非常流暢，今次Apple Care服務快而準(咁當然，同時係因為小弟巳經事先完全了解掌握Macbook既情況，直接清𥇦表達到服務要求)，感覺舒服而且Pro，真係要讚吓！雖然已經無保養，Apple Care服務費用係$0！小弟部Macbook幾經波拆後，浴火重生！係Macbook重入OSX既一刻，小弟不能自控咁要拍吓呢個畫面!

第五步終極散熱優化，整得返部Macbook，就要小心照顧佢，希望最少用多3幾年。特別係散熱問題，因對使用壽命有關鍵影響。Macbook就咁平放檯面空氣對流唔好，用一陣機底已經好慶熟。小弟用咗兩排共14個鋁質小型散熱片，用導熱膠紙貼好係機底後半段部分，一來大幅度提升機身表面散熱面積，二來將機身升高增加機底空間，改善機底空氣對流！貼咗散熱片之後，機底溫度就控制係和暖既程度，Macbook睇落仲更型仔，真係有姿勢又實際！

第六步零浪費，原來死咗既500GB HDD，行咗disk fix之後，小弟幫佢加咗個平靚正透明又醒目外置USB case，就用得番，用來做data backup！

呢部2011年版Macbook，小弟前後用咗大約$1,000換電池SSD及加裝散熱片，2個man days裝拆及清潔。救返部市值$10,000以上既Macbook(15" display + i7 CPU + 8GB RAM + 120GB SSD)，今時今日都唔失禮，亦係當初小弟評估，認為值得投放銀両同精神拯救既原因，証明小弟英明判斷。

Macbook行返之後覺得好爽，新既一樣，仲好過原本，好有成功感，環保亦同時少咗一件電子垃圾！

相關文章

Macbook 拯救大行動第一章：重見天日
Macbook 拯救大行動第二章：除塵散熱
Macbook 拯救大行動第三章：浴火重生
Macbook 拯救大行動第四章：心細手巧

Macbook 拯救大行動第二章：除塵散熱

話說小弟部封塵Macbook經過第一步換電池及第二步換SSD之後，就嚐試開機希望可以先裝番OSX上去，睇吓效果。本來以為電池重新運作，Macbook用disk util又認到隻SSD，可以重新間partition及erase，就搞掂。可借小弟發覺去到最後一刻重裝OSX時，Macbook就話OSX原碼有錯誤，無法繼續。小弟用盡方法經internet recovery，或外置USB啟動OSX installer，三番四次結果都係一樣。

好明顯，真係好有問題，因為連個錯誤報告本身都係錯既，OSX原碼有錯機會機乎係零。係嚐試重裝OSX期間，Macbook亦運行得非常唔穩定，不時鎖機需要強制熄機！另一方面，開機十幾分鐘，機底已經有不尋常赤熱感，睇來有機會係積塵，散熱不良，甚至更嚴重係底板出事！

只靠換電池及SSD拯救Macbook既期望幻滅，小弟只能繼續進行充滿風險既第三步，除塵及改善散熱。小弟好小心好細心咁，驚死整斷插座線頭，用咗大半個鐘，慢慢將散熱風扇及底板分離機殼，用軟刷及風筒除塵。又將底板上既T字形散熱板移開，抹走原來乾涸咗既散熱膏，再重新刷上新鮮潤滑既。成個拆裝清潔底板及刷膏過程用咗大半日時間，總算係乾乾淨淨，機身內部煥然一新！

經過一番努力之後，小弟以充滿期待既心情，重新再嚐試裝OSX，可惜Macbook又再一次使小弟失望，繼續話係OSX原碼錯誤！不過努力過總算係有些微成續，操作不穩定不時鎖機情況已經消失，小弟亦確定咗機身內既散熱風扇有運作，機底發熱情況有改善，但仍然熱得太快，散熱效果唔理想。

拯救Macbook過程一波三折，咁小弟做咗咩最終使Macbook重生？！下一章就係大結果，驚喜不斷，不容錯過！先出d圖刺激吓C兄眼球！

2018年8月19日星期日

Macbook 拯救大行動第一章：重見天日

好啦，又係小弟分享吹水既時間，話說小弟繼續進行Project Move，由於正務繁忙，只能做住d週邊準備工作。今次小弟準備係私Lab起番部Macbook做Head-Fi數碼音源，亦方便小弟係私Lab時上網，睇論壇同寫吓私Blog。

小弟呢部Macbook Pro係2011年入手，行咗幾年，跟住就變得好唔穩定，成日死機，個Pad又不時會無反應，最後仲炒埋碟，完全boot唔起機。其實小弟心中有數，知道大概係咩問題，本來有心想去救吓機，不過都係太忙，一拖就幾年，部Macbook就咁放係度食塵。

小弟最終拆開部Macbook一睇內部究竟，除咗已知炒HDD，舊鋰電池原來已經發漲死亡。底版，散熱風扇，heat sink都大把塵。同小弟想像既一樣，果然係內部元件老化，積塵及引伸既散熱問題。經過仔細考慮，小弟決定要投入些少資源同時間嚐試拯救，比Macbook重見天日。

第一步係要換電池，上網入咗一件兼容電池，一個星期後收貨，一換就掂。小弟選咗隻相對貴價有牌子既環保電，因為電池質量對安全第一要求係至關重要，係唔慳得既！

第二步係要換咗原來既500GB HDD，改用SSD，可以大幅度改善系統表現。小弟特意選咗120GB相對比較細既容量SSD，唔係想慳錢，係唔想OS同data放係同一隻碟。小弟只會用SSD裝OS同Apps，最多係行埋boot camp上埋Windows 10。至於私人data只會存放係外置USB手指。

第三步就係要除塵，改善散熱問題，亦係最繁複充滿風險既一步，因為要拆風扇，將整塊底板分離機身。小弟唔可以呈一時衝動行事。參考網上介紹拆散部件片段，果然唔係piece of cake，有十幾粒螺絲，各類大大小小唔同插座要解扣。難唔到小弟既，不過要入番一套合適既拆機工具，就可以事半功倍！

下一章會介紹除塵及散熱程序，更新Firmware重裝OS，及係Apple Care接受服務既體驗，保證精彩內容！

2018年7月22日星期日

Project Move 第八章: 安全第一

小弟既 Project Move繼續緩慢進行(龜速)，Head-Fi系統遷入未有定期，因小弟正務繁忙，未能全力投入，只能做住d週邊準備工作。

小弟一向好注重安全健康，特別係防火方面。雖然私Lab裏面已經有2個滅火筒，小弟都準備咗另外兩件防火物品加強人身保障。煙霧警報器係希望及早發現可能火災，逃生成功機會就會大增，仍係重點所在。

另外有一張防火氈，主要係幫助逃生時隔開火熱，保護身體唔好被燒灼受傷。至於滅火筒，係壓抑火熱開路逃生，唔係去滅火，滅火應該留番比專業既消防員！

最後係同健康有關既吸濕器及空氣清新機。話說小弟暫時係私Lab既時間比較短，長時間陰暗缺乏空氣對流，成個空間都覺得有一陣霉臭，使人好唔舒服。吸濕器插上電源使乾燥之後，就可以再放回潮濕衛生間原來位置吸濕除霉，環保可重復使用。

空氣清新機正好係可以用來壓抑細菌病毒生長，為求最好效果，小弟特別選咗適用範圍去到50平方米型號(私Lab面積少過40平方米)，而且低耗電量設計可以24小時長期工作，非常適合小弟當前需要。

2018年6月16日星期六

Project Move 第七章: 從無到有

今日2018年6月16日，小弟第三次返私Lab，又係收嘢同清潔。由於私Lab所處比較隔遠小弟住處，小弟近期工作亦比較繁忙，所以Project Move既進度係緩慢，不過唔係無進展。

小弟收咗好多盒嘢，C兄唔好誤會係用來買賣既貨物，佢地其實係友好免費相送既一批空木盒，比小弟作裝修間格，裝膽或其他零件。另外有親友讚助古典中式實木檯椅一套(1檯4椅)，作為娛閒區聚眾之用，亦將於不日遷入，雖然未必完全符合小弟品味，但好似新既一樣，最緊要唔使錢，物盡其用(而家用住兩張平靚正銀白色膠摺椅，先頂住作休息之用)，小弟又可以省下一筆銀両！

實際操作方面，天時暑熱，首先當然係檢查及清潔個冷氣機(長梯真係不可缺工具!)，小弟吸咗d塵，搞到鼻癢癢！

私Lab不斷從無到有演進，過程將被記錄，不為什麼，係小弟自已日後既回味！超廣角去圖 ......

2018年5月21日星期一

Project Move 第六章: 逞心佈局

前文Project Move 第一章: 螞蟻搬屋，小弟收番奈米office己用，作為玩嘢私Lab。今日2018年5月21日，第二次返office，目的係收貨，之前網購咗既長梯及打掃潔具用品。Project Move螞蟻搬屋，總算起動，有番些少進度啦! 未來一個月會主打做清整工作，同時進一步了解office地板面積，並優化設計佈局。

今日收集咗更多尺吋數據之後，重新再做個Floor Plan(每個方格相對比率係2尺 x 2尺)，依大概比例標示各區域作不同用途。唔使小弟多講，非常清楚，C兄一眼睇哂!

話唔使多講，都要記錄番設計背後理念! 首先最重要既就係，第一階段先上3個鋼架，應該夠小弟裝入WA5 + WEE及STAX系統，DAC及作為訊源Macbook，電池補完，等等。

其次就係小弟期待咗好耐既私人工作枱，L型設計可以盡量接近右邊放Head-Fi系統鋼架，方便連線品聽及測試。當然，小弟部示波器及其他玩嘢裝備工具，都會放係呢張超級工作枱上，真係想下都興奮!

另外，小弟預留咗最真貴，最大既一個區域，作為日後擴充及休閒娱樂區，放一張大枱及兩張長排櫈，飲飲食食，聚衆吹水，甚至係玩開壇砌機比評都得!

睇落小弟個Floor Plan真係好正，不過一樣有死位! 今日係度尺既同時，亦用電磁測量儀器審視咗office每一個角落，電場及射頻强度都非常低。不過係磁場强度方面，柱身左邊X標示既紅色區域，係其他正常地方合理水平既20倍以上，如果再接近柱身甚至會爆錶! 不適合作息用途範圍!

高磁場估計係與柱身背後係大厦電梯槽位有關，或柱身内藏特別電器(摩打?!)，小弟再想唔到其他合理解釋! 真係唔測唔知，知又唔知會咁高，真係好多隱形死位，長期係附近作息，咪話唔擔心有咩後果，避之則吉!

今日小弟無測驗"超自然"能量體，會唔會有?! 小弟遷入之後，同小弟一齊品聽Head-Fi效果，甚至一齊體驗"一體臨場"感動境界?!

待續 ......

相關文章

Project Move 第一章: 螞蟻搬屋
Project Move 第二章: 性價品味
Project Move 第三章: 壯觀陣容
Project Move 第四章: 先利其器
Project Move 第五章: 電源接地
Project Move 第六章: 逞心佈局
Project Move 第七章: 從無到有
Project Move 第八章: 安全第一

2018年3月9日星期五

Project Move 第五章: 電源接地

話說小弟一直想玩隔離變壓器，又想用佢搞吓再生電源，試吓音響效果分别。拜讀過有關隔離變壓器應用及安全考慮，出乎意料，隔離變壓器係連接多件用電器具系統上出現安全隱患機會可能更高，身體有多過一點接觸電器亦可能觸電，而且仲無咗漏電斷路保障，人身安全就更危險!

最終結論係，隔離變壓器只用係後級系統(音源及DAC方面, 小弟已經行緊電池供電)。安全第一最緊要，玩唔玩隔離變壓器，良好接地都係不能少。心水清C兄見到呢卷黄綠間色電線，就知佢有特殊用途，無錯，準備用係新場，將鋼架每個間隔都接地。

Project Move 第四章: 先利其器

雖然小弟屋企已有一把鋁梯，不過得4級，係office用就唔夠高，由其是要清理天花上既冷氣出入風口隔網，換燈膽，及將來搬器材上落鋼架，呢個6級鋁梯就好合適，睇落亦唔阻地方，有埋歐洲安全標準，不可決少工具。

係正式搬Head-Fi家當遷入新場之前有好多準備及清理工作要做，小弟親自一手一腳，再加埋呢個手提電池電鑽，鑽孔搞吓小裝修都無問題! 2018年成個3月同4月，最少都要執番一頭半個月，然後先可以正式入手鋼架擺位。不過一想到有自己既office玩嘢，一切都係值得既!

2018年3月5日星期一

Project Move 第三章: 壯觀陣容

小弟做咗個office floor plan睇咗成個星期，經過幾番考量，決定分兩個階段，如圖裝備兩組鋼架。兩組鋼架總共有8(5+3)個間隔，每個間隔大約有2.7呎濶，係以實際使用上便利同觀感以7字形佈局，中間放一組大枱同櫈，咁就可以同時睇到同接觸到兩組鋼架。

係實際安裝上，小弟會先上第一組5個架(其實只入3個獨立架，不過佢地合組之後，將多出既2個侧架再硑接上去就可以有5個間隔)。小弟準備1個間隔放電池補完同其他同供電有關裝備，另1個放小弟d耳機(10隻8隻排起都用咗成個架)，再來2個放WA5，WA22，WA6SE同STAX系統，最後1個間隔就係音源，DAC，MacBook及其他前級裝備。至於另一組3個間隔(2個獨立架拼合)，其中1個係作為小弟既工作枱，另外2個係擴充備用。

擺好之後，一入門口就見到正面同側面一字排開鋼架陣容，非常壯觀有氣勢!

Project Move 第二章: 性價品味

小弟將Head-Fi家當搬入新場，重點中既重點就係要揾合適既收納架。所謂既合適係以堅固實用，以合理性價比為主，其次就係品味同設計。小弟無意重金入手專用防震架，寧願之後自己再DIY搞減震。

小弟睇中咗呢款橡木不鏽鋼架，唔係pro嘢亦唔係cheap嘢，設計簡約美觀，亦夠承托力，完全符合哂小弟理性及感性要求。準備先入手一個試吓，如果效果好，就會大手入多幾個唔同大小款式，作為新場主體間隔佈局。

Project Move 第一章: 螞蟻搬屋

踏入2018年，小弟既玩嘢生涯更上層樓，可以話係小弟人生幾十年努力後既收成期，唔係大出血買機買膽，係脱離唔係好見得人既sofa㡳藏電格局，系統將搬入私窩，完全屬於自己既玩嘢天地! 新年頭祝各位C兄荷包腫脹，水頭充足，繼續血拼! 好消息陸續有來!

今日2018年2月23日，小弟終收返個奈米office，實用得果260平方尺，感覺好似個大㕔咁。小弟準備留作私用，所有家當Head-fi系統包括WA5，WA22，WA6SE，STAX，電池補完全部都會搬哂入去。雖然搬遷係大project，但小弟已完全掌控局勢，唔使急又唔使要快，無壓力慢慢螞蟻搬家執正佢。

呢個場小弟會做個人Lab，以後經典試聽大計就可以係完全屬於自己既私人空間中進行，點玩都得! 點可以唔興奮! 其實自小弟幾年前中毒上癮以來，真係投入咗唔少财力同心力，心裏面亦一直有一個理念，"沒有最好的組合，沒有絶對的音質，只有感動的音韻"。所以小弟係有生之年，希望盡量聽多d唔同組合，發現更多可以感動小弟既"一體臨場"效果。

講返個場，除咗小弟個人私玩"獨樂"，其實同時希望可以亦係"同樂"既地方。小弟有繁務正業在身，星期六日先可能入場開壇玩嘢，過多幾個月，小弟擺好d嘢，到時歡迎C兄揾上門，同小弟吹水交流。如果C兄帶埋家當上門，咁就可以試吓同小弟既系統夾一夾，一齊聽吓新火花，比小弟開下耳界。特别係可以試吓用小弟膽後級推C兄耳機，或者C兄有自己音源/ DAC可以試feed小弟膽後級，甚至係試推下小弟隻AKG K-1000耳機睇吓出咩效果。試玩其他線材及調音配件亦歡迎，總之大家盡量聽多d組合，欣賞更多唔同效果。

訂閱：文章 (Atom)