Woo Audio WA11 Topaz

WA11係一個小弟一見到就喜歡既產品！可惜最近先發現佢既存在，而且已經擁有咗AudioRequest DragonFly Cobalt，否則一定會入手WA11作為小弟流動系統既核心！小弟想同時擁有WA11及Cobalt，Why not?! 

高質剛陽

話說小弟一直都係Woo Audio既fans，由WA 6SE，WA22到WA5，一口氣連升三級玩佢既膽機。小弟Blog文及“經典試聽大計！”亦係有好大部份圍繞住Woo Audio膽機系統做Tube Rolling。Woo Audio一向比小弟既印象就係，高質剛陽，簡約豪無多餘花巧既格調。

WA11比小弟既第一印象，似乎都係承傳咗Woo Audio一貫既基因，所以小弟一睇就感覺非常討好。好明顯就係以往一直以來所建立既信心。不過，小弟係非常理智，要說服小弟入手，就要經得起小弟既嚴格審評。除咗信心同格調之外，WA11究竟有咩實質特性可以吸引小弟？

核心性能

首先，WA11既設計唔係走一般整合性能DAP既路線，WA11只提供咗DAC及AMP兩部分核心功能，作為外置播放器音源及耳機之間既轉換器及功率放大器。

WA11定位係Hugo一類既產品，不過相對上，WA11係功能上就無Hugo咁多樣化，咁WA11既獨特性係邊度，點解要選佢？

Class A設計，寬頻響應(10Hz-200kHz係咪過份？)，大功率低阻抗輸出，就咁睇紙面技術指標，已經夠吼人！對小弟來講，WA11既第二個賣點(第一個賣點係信心)，就係佢內置強勁又可携既功率放大器！睇落已經無咩耳機係佢推唔起，非常適合品聽不同特性耳機既需要！

 

獨特設計

WA11既第三個賣點，就係佢專用既Unity Smart Case，如果小弟最終決定入手WA11，呢個一體式外殼係必買品！

好明顯，將當今時代每個人都要隨身帶既手機，作為播放器，然後經Unity Smart Case同WA11 + 智能手機，一體化組合，好處太多！唔使講可以單手便携(好似仲可以掛腰帶)，感覺帶少件嘢，方便靚仔得來，又可以橫直角度座枱，點都好過DIY魔術貼橡膠圈相縛，成個土製炸彈！

最重要係，一體化之後既組合體，唔止變成一部DAP，同時亦係一部音效增強型智能手機，提升睇片玩遊戲體驗！有得揀，小弟都會選呢個多用途裝置WA11＋智能手機，利用手機加裝軟件，提供例如串流及其他服務比較開放既配平台，多過獨立一台封閉式DAP！

音色期望

Woo Audio一直係出膽機起家出名，之前既WA8 Eclipse就係一個可攜式DAC及膽管功率放大器，以膽音單端輸出定位。相比之下，WA11以半導體元件提供全平衡設計，好明顯，就係一個回應市場既新嚐試，睇來又係一個成功定位產品。

係音色方面，相對於類似市場產品Hugo，WA11應該係屬於剛陽大氣一類。至於同廠兄弟WA8多咗一層“淳厚悠盈”膽味比較，係全平衡音場空間感淨質量及大推力輸出方面既提升，各有所長，各取所需。

理想改進

對於WA11既功能，小弟個人希望將來有新既改進，提升可用性及適配性。

DAC部分可以提升支援到原生DSD512，及加入用家可選既調音濾波器，提供簡單既三頻響應微調。另外亦希望有獨立Line-out接口。

對於配合Unity Smart Case，小弟希望通過充電WA11既同時，亦可以同時為手機充電，真正一體化體驗，免除經常拆卸轉線既煩惱！

出文時，官方確定WA11係安排了唔能夠直接為手機充電以達到最佳音效質量，同時建議使用舊有手機獨立配合WA11，或選擇WA11既“完全版”。

性價比較

小弟以官方提供既WA11“完全版”作為參考。“完全版”索價2049美元(除咗Unity Smart Case，仲包括咗Samsung A51智能手機作為播放器)，巳經達到Lotoo PAW Gold Touch及iBasso DX220 Max，FiiO M15，Lotoo PAW 6000價位水平。

總體上來講，功能方面係相對遜色於同價位水平既DAP。首先係用戶介面，變成手機UAPP應用程式。其次係，DAC部分性能亦只能算一般，提供去到DSD128 DoP模式，如果對訊源有較高要求，WA11就唔係理想選擇。

不過唔好唔記得，正如前文提及，同時多咗部6.5吋大芒智能手機。WA11 + 智能手機，一體化組合係有佢既優點，仲有幾乎係最強勁Class A既功率放大器。

“完全版”比“標準版”價位要高出650美元，值唔值呢個問題，純粹又係睇個人應用。如果唔鐘意玩嘢，又要裝UAPP又要自己搞Config，就唔好考慮“完全版”，直接入部一體式DAP好過。以小弟個人既情況，應該係“標準版”再淨加一個Unity Smart Case，配合自己用慣既智能手機！

感想小結

WA11係好適合小弟“經典試聽大計!”應用。WA11對比小弟現有既Cobalt音色如何？小弟做咗個粗略對比及評測，參看另文AudioQuest DragonFly Cobalt 第七章: 實力評測。

如果之後小弟發現Cobalt配合耳機方面效果未如理想，就好可能會入手WA11。有趣既係，係官方網站上建議配對耳機都係大耳牛，Sony IER-Z1R入耳式耳機亦在列，更加引起小弟好奇同暇想，WA11 + Z1R既效果，係咪真係識飛？！同配上Cobalt＋Z1R既“鮮活感性”又有無得比？！