話說小弟之前係另文煲機煲線自說自話有關問題，跟住走咗去同煲線神器Audiodharma個店長吹水揾桔。吹吹吓，就決定係可見將來(病疫大勢穩定之後)，真係入番一枱Audiodharma Cable Cooker旁身！ 本文又借題發揮分享吓小弟心目中既入手型號，及從店長所得到既額外資訊。
Audiodharma小弟就選硬啦，Audiodharma都係安置佢係小弟私Lab，盡量發揮線材性能，配合小弟既“經典試聽大計”！到時亦唔排除開放同C兄分享煲線體驗！參考資源: Cable Conditioning and the Cable Cooker/ FAQ。點解係Audiodharma？又話要耳聽為實，小弟未玩過未聽過，就話要選佢，做咩咁肯定？C兄睇完再話小弟合情合理先算啦！咁當然，小弟跟住既評論，只係基於枱面上既資料，同埋小弟個人獨特環境同取向，不可一概而論話都適合其他人C兄！
應用玩耍
首先，小弟係唔會考慮專業級Nordost Vidar2，Telos QBS煲線機，講緊10w或以上，算得上係一項投資，玩到咁大除非決定開舖賣線，否則買返來係鋪塵時間更多！其次，小弟對迷你型煲線機亦興趣不大。唔係話睇小佢地，而係小弟覺得玩煲線呢樣嘢，一係就乖乖地好似小弟而家咁，線少少就用傳統文火，最多加些少噪音訊源輔助就算啦。一係就玩大些少，有不同組合玩法同對比先好玩！
斬頭斬尾之後，得返Audiodharma Cable Cooker同Blue Horizon Proburn，小弟就再做些少兩者對比。首先，緊係睇樣攞個第一印象，好明顯，Proburn既外型比較討好，有質感有曲線，完全附合大廠投放資源設計既產品格調。Audiodharma相對睇落就成個大四方盒，仲有些少DIY既土製味！再睇售價，Audiodharma有多款型號，其中入門級索價999美元，同Proburn價位相近，佢地似乎係旗鼓相當！
勝負之間
到咗分勝負既時候，先講機身接線頭佈局及指示，好明顯，係Audiodharma勝出，係用家既角度出發，左出右入，版面前面一次過見哂做哂所有動作，簡單清楚，BNC接頭亦係Audiodharma獨有。Proburn既情況就係搞到太複雜，又前又後，又左又右兩邊走，接線方向亦無清楚標示。
再講技術性能，Audiodharma既內部工作電壓係12V，最高階版甚至去到15V。Proburn就係5V，雖然咁唔直接代表實際效果既分別，但係表明Audiodharma既電位差及輸出功率可以大得多，意味可以一次過串連更多線材同時煲煉。以喇叭線為例，煲煉輸出功率，就可以超過20W(rms)，真係可以稱得上“猛火”！小弟唔係話Proburn就唔掂，但係相對上，淨睇火力，枱面資料Audiodharma要勝一籌。至於掃描頻寬方面，Audiodharma標明係0-40kHz再加諧波，Proburn無交待清楚，只話係CD輸出既10,000倍，信唔信？
有麝自香
最後小弟想提出既係，Audiodharma係一個有二十年歷史有進化既產品，最新既版本係3.5及3.5增強型，有多款升級型號，配搭更優質內部接線及元件可供選擇，索價由999至1799美元不等。總結小弟所做既功課，如果Audiodharma係一個務實型“用家產品”，咁相對上Proburn更似係一個就手型“市場產品”！
雖然小弟一直強調耳聽為實，係未能客觀條件對比試驗情況下(例如，兩條相同全新線材，分別用Audiodharma及Proburn各煲48小時，再品聽效果)，兩者只能選一，小弟自然係選擇Audiodharma。所謂有麝自然香，好嘢會經得起時間考驗！做足功課就完全無猶豫！
性價之選
Audiodharma提供咗整個系列共4款產品，小弟會選邊個？首先，小弟既情況係個人應用及一般分享，唔係做賣線材，所以效率唔係最重要考慮因素。小弟係傾向選擇Premium版索價1199美元，比標準版高出200美元(20％) 。Premium版提供額外高質內部接線及接頭，效能效率係有所提升，從長遠耐用性及性價比整體考慮，係小弟最佳選擇！
高能效率
另一款吸引小弟眼球既，係最貴既HI-POWER版索價1799美元。小弟出於好奇，出咗幾隻e猫請教Audiodharma店長相關產品資訊，原來已經出品咗幾年，係專為線材商諚造，可以提升煲線效率(大約30％)，同時亦有助進一步提升音質效果咁話。
對於HI-POWER版，畢竟係高出Premium版600美元(50％)，小弟覺得唔係自己應用情況下既最優性價比。一來提升煲線效率對小弟意義不大，另一方面，進一步提升音質效果，好難對所有線材品類有劃一標準及效果保證，所以亦係不抱太大期望。
雖然小弟出文時話會選Premium版，但係世事無絕對，小弟如果真係玩大咗開門做生意，配合經濟效益應用，入手HI-POWER版亦係情理之內！
沒有留言:
發佈留言