小弟年幾有翻咁上下，做下小工程可以防止腦衰退，又可以過吓手癮。
2021年2月14日星期日
2021年2月10日星期三
Linear Power Supply 線性電源/ 電池補完
小弟將之前買落舊有既鉛酸電池DIY串連成一組，再加埋保險絲及5米DC延長線，土製咗一個18V/7AH高壓電池比iBasso DX220 Max鋼磚，目的係將電池部分盡量遠離人身，鋼磚就坐枱放係睡房牀頭，方便小弟休息時品聽！
鉛酸電池組主要係安置係屋企室內一角供電比鋼磚AMP部分使用，數字供電USB部份，小弟用咗個5V/9AH舊既手機尿袋供電，至於另文iBasso DX220 Max 第十章: 電池補完，果片外置鋰電池，就留返流動外出時備用。
效果如何？成組嘢唔使$500，用料都係最普通平民級別，雖然係粗製粗用，效果比直接用原廠火牛好太多，小弟再係DC延長線繞住一大塊抗電磁波天然礦石，之後再接去鋼磚，效果絕對係飲得杯落！用返三幾年應該無咩問題，比入一隻過千蚊18V LPS更安全好聲！
電池補完
多年前小弟用逆流器(DC to AC Inverter)起咗個電池補完系統供電比後級Woo Audio膽機，今日歷史重演，小弟又起咗一個進階版電池供電系統配合鋼磚及前級系統。小弟係咪得閒無嘢做？有無必要又搞一壇嘢？聽過效果差別之後，及長遠既佈署，絕對係值得！
呢章內容會比較技術性，需要有一定電子知識及相關DIY經驗。唔講嘢住，先出圖考C兄眼光，之後再補文。不過可以先講試聽效果，正！基本上同鋼磚內部電池供電時既品聽效果無咩分別！
穩定通用
先講一講需要，話說小弟要為鋼磚準備一個座檯電源，可以提供一節大約4小時既品聽電量，基本上就係一個18V/1A高壓部份既電源裝置，完全代替鋼磚既原廠開關式火牛。
既然要做，就做好做得穩妥更廣泛，除咗鋼磚亦可以同時比低耗電量，但高質要求既DAC及前級使用。考慮到穩定性及通用性，其實係要一個2A電流量，可調穩壓5V-24V低噪電源！
性價選擇
需要搞清楚之後，就係要揾合適產品，市場其實係有18V/2A線性電源LPS，大約$1,000左右，名牌大廠係$2,000價位，但係佢地都唔夠彈性調整電壓，亦只能以A/C輸入供電。
小弟希望可以同時直接接受電池DC供電，再經LPS穩壓保護輸出，係完全可行。原來LPS既A/C輸入端，直接電池供電，無須改變電路，亦無須分別連接極性，只係要預多1.5V左右電壓降比橋式整流子。效果一定比行A/C輸入更好更安全！其實就係一個DC-DC熱損耗低效率降壓穩壓電路(非開關式)換取低噪供電！
係咁既背景之下，加上前文直接試用現有鉛酸電池組得到既理想效果，小弟決定DIY一個由電池輸入供電既LPS，而且係可調電壓！小弟無時間好似幾十年前咁自己砌線路板執零件組裝，最終揾到呢個組件成品，經典可調壓電路，功率穩壓IC，高速整流子，大電容平滑丌形濾波，零件用料工藝都唔錯！送貨成品，加埋小弟自己出接線接頭，配散熱器，限流及負載電阻，都唔使$300，算係平靚正！
測試應用
好啦，講返幅圖，基本上就係兩個部份，鉛酸電池組件，經過保險絲及限流電阻，供電比LPS組件。電壓方面，微調電位器可以連續調節輸出，小弟將電壓固定係18.5V。為求安全，小弟先做穩定性測試。接上50ohm負載電阻，連續輸出電流大約0.4A，行咗2個鐘，電壓恆定，功率元件亦無明顯熱度，效果非常理想！
應用細節方面，細心既C兄會見到鋼磚數字供電部份，獨立接住5V鋰電池尿袋，模擬供電部份接到LPS。當時鋼磚內部電池量大約係80％左右，正在接受充電，同時亦播放音樂推動Sony IER-Z1R耳機，電池總負載電流少於0.5A，同小弟先前既電阻負載穩定性測試相當接近。一路充電一路播放大約2小時之後，鋼磚內部兩組電池都已充滿，係只播放既情況下，電池總負載電流降低至少於0.3A。
小弟既平民版電池補完成功咗，做價係$1,000之內，包括鉛酸電池組$600，LPS組件$300，機盒及雜項$100。
豪華理想
當前24V/7A鉛酸外接電池組係可以勝任，但唔算得上係理想！假設每次使用4小時輸出電流0.5A就係2Ah，已經大約係電池組既30％電量。係淺放淺充原則提升電池壽命方面考慮，就要即刻充電不宜繼續放電，即係電池組使用一次就要充電一次！
其中一個捷充方法係，LPS組件橋式整流A/C輸入接頭，經過選擇開關，可以接到一個18V/2A輸出環形火牛，提供A/C降壓電源連接，成為一個傳統以A/C供電LPS。LPS DC輸出先為鋼磚優質充電(好過原廠開關式火牛)，同時亦可作其他穩壓通常應用。係要品聽時，就切換成電池供電播放，得到最佳品聽效果！但係，外接電池組亦要每使用兩次充一次！
所以，最終既豪華版，理想電池補完系統，係要兩者兼得！一方面，配上環形火牛提供傳統通用輸出既同時，再換上高密度大電量既鋰電池組24V/20Ah以上，可以支持最優質品聽效果連續一星期既用電量，大約係8.4Ah = 0.3A x 4h x 7。再配一個7日週期編程A/C開關，設定每星期自動為電池組充電一次！
如果玩盡佢，仲可以配埋內外優質DC接線接頭，執齊埋環形火牛，鋰電池組，就算係DIY，無返$3,000以上都落唔到樓！對比小弟當前既平民版電池補完，又係另一個故事！睇吓豪華版幾時會出現！
線性電源
話說小弟最後決定要DIY一個獨立兩組，5V-24V/2A，可調壓穩壓壓低噪通用線性電源，仲可以選擇A/C或電池DC輸入供電，充電鋼磚或純粹最優質播放，或者供電其他前級系統。
最重要部份已經揾到合適環形火牛160VA，兩組次級可以每組獨立A/C輸出22V/3A，完全滿足需求，入手價連運費大約$600。
待續 ......
2021年2月1日星期一
Sennheiser HD600 大理石的傳奇
HD600多年前入手之後，用座檯Woo Audio膽機推玩過一段時間就入咗箱，由於太忙就咁放低咗佢一段時間。小弟最近收拾家當時，係箱底捉番隻HD600出來。
HD600重見天日，想點玩呢？C兄見到幅圖就知道發生咩事！用手機接AudioRequest DragonFly Cobalt推HD600？有無搞錯？掂唔掂？
如果唔掂，小弟就唔會出新文啦！HD600收埋咗一段時間，要比佢先熱身番幾十個鐘。小弟戴住佢隨身聽，勝在夠輕，開放式設計，主要室內品聽，戶外流動始終隔音方面唔理想！
待續 .......
訂閱：
文章 (Atom)