深度體驗(上)
呢一章，小弟同C兄分享對Cobalt既進一步體驗。Cobalt本身既效果要得到充分發揮，其實要有綠葉扶持，就係其中既UAPP播放軟件。對小弟來講，UAPP最大既價值，就係支援BitPerfect模式，簡單講，從音源檔到DAC最後轉換成可聽模擬音頻訊號，其間數碼訊息取樣分析度始終保持一致，對原始音頻訊號無作出任何改變。另一方面，Cobalt本身亦提供一個內置硬體64級數字化BitPerfect音量控制，從而得到最大程度“直白保原”效果。
呢種“直白保原”，絕對係作為一個共同訊源，對比系統其他部件品聽效果異同既必備性能。係實際品聽體驗上，BitPerfect模式下既CoTak846，相比一般模式，又係另一個層級跳躍式全面性既絕對音質提升。小弟既推煲品聽，除咗入手前既初聽，就一直行緊BitPerfect。呢種“直白保原”模式同時亦係小弟品聽調節CoTak846既基準，期望可以達到“一體臨場”，好幸運，小弟最終係CoTak846組合上，可以得到呢份終極體驗！
其實CoTak846可以得到終極體驗，唔係完全既幸運，有一部份係基於SE846可調音功能！話說小弟入手Cobalt已經超過一個星期，品聽時間亦已超過咗二十個鐘，SE846既表現變化非常明顯，從初聽“直白無染”，到“剛陽緻密”，感覺SE846被“爆裂”開封，係高興之餘，同時又有憂慮 ......
CoTak846原來既“鬆容”氣度，隨住品聽時間增加，開始出現“逼迫”感。雖然淨質量不斷提升，但係小弟意識到平衡點巳經轉移咗，出現“過亮”。好明顯，CoTak846組合既高頻響應係過咗火喉。小弟曾經通過播放軟件既音頻均衡器作出“再平衡”調節，但係音頻訊息經過處理，意味住行唔到BitPerfect，就咁犧牲咗原來“直白保原”既高動態及高音質，實在太可惜！
正當小弟有些少失落感時，突然想起SE846係可以玩調音既，最終小弟將原本既中性藍色調音棒改裝成偏暖黑色棒，又換用黃色隔音綿。SE846換調音棒，係進入耳朵最後一段通道，以可控改變物理結構方式，衰減部份高頻範圍(1kHz - 8kHz)響應之後，真係無咗“逼迫”感，最初時出聲係有些少“磨砂”不協調，繼續品聽幾個鐘之後，就回復正常，又有返原來“鬆容”氣度，同時保持住BitPerfect模式既高音質，真係可喜可賀！再一次證明小弟英明神武，SE846果然係最適合小弟既玩嘢之選！
深度體驗(中)
上一章小弟提到，CoTak846既效果有些少偏亮，小弟利用SE846調音棒，衰減部份高頻響應，減緩咗“逼迫”感。係新既音調設定下，小弟品聽咗十幾個鐘，效果如何？
首先，低頻部份有聽得出提升咗既彈性，呢種彈性，可以用“更醇”來形容，雖然有提升，但無任何過熱，散漫，沉重或潛爆現像，整體上未有超出“自然”既突出感，係一種優質悅耳音色效果既控制及變化，相當吸引陶醉！
針無兩頭利，有得就有失，講完好消息，都要講埋唔理想既地方！整體空間感無變化(無盡宇宙)，音像由深縱方向，向闊橫方向作一部份轉移，幅度唔算好大，但容易感受到，好彩仍然係可接受“自然”範圍之內。
最使小弟有失望感既，係一份小弟覺得係CoTak846獨有既音像質感(實在感)，明顯地衰減，係衰減到一個程度，使小弟覺得失去咗呢個組合既獨特性！或者唔可以叫做衰減，而係小弟對音像體驗既平衡感被改變咗，音像輪廓好似無咗一邊咁！更貼切既講法，小弟原來係希望新既調音效果可以減低音像既整體線條深度，但係聽到既感覺係無咗半邊實線！小弟要強調既係，呢個係一個“相對性”既體驗，並唔代表調音後既效果出現咗大問題，只係，聽過未調音之前既“實在感”，小弟就好難唔作出咁既“挑剔”！
咁奇怪既經驗，小弟點樣取捨？小弟決定要再換調音棒，試聽埋SE846提升高頻“加亮”既效果，雖然預期效果可能會向更唔理想方向發展，一切耳聽為實，唔可以就咁未聽先判 ......
深度體驗(下)
話說小弟玩換SE846調音棒效果，希望進一步優化品聽CoTak846組合體驗，小弟今次試用白色調音棒，對高頻部份(1kHz至8kHz)提升增益。聽咗一節，大約係兩個鐘左右，小弟好快就再轉調音棒，將SE846調返去最原始既中性設定。
首先報告調高高頻部份增益之後聽感，效果幾乎同小弟既預期一致。音像更突出，被“放大推前”，而且像體形態亦有變化，亮度係提升咗，小弟要將音量降低兩小級。係細節方面，人聲磁性感提升，甚至出現些少“逸味”。整體而言，小弟覺得調音後效果都係“自然”範圍之內。
經過呢幾次調音體驗之後，明顯地對 CoTak846組合更了解，簡單既講法，就係“悅耳彈性”及“明亮磁性”之間既對比。所意外既係，原來係中性音調既“逼迫”感，係一低一高既調音後既效果，都大幅減緩咗，究竟係咩一回事？
小弟心裏面巳經有咗線索，SE846轉返中性音調再試，果然係咁！係隔音綿既變化，係原本黑色孤形及黃色圓柱形既分別！原來進行調音既時候，小弟同時改咗隔音綿，“逼迫”感既減緩，同改用黃色隔音綿有直接關係，似乎黃綿比黑綿更能吸收某類引起“逼迫”感不必要既“衝擊”！
隔音質料形狀作用及其中原理，小弟就唔深究了，總之一切耳聽為實！回復中性音調既CoTak846配上黃色隔音綿，小弟聽完一節後，前途就係一片光明，彈性及磁性，兩者平衡兼得！誕生一個全新既“一體臨場”體驗 ......
更加有趣既係，小弟對調音後效果既體驗，同時說明一個事實，原來小弟既聽感，同廠商既出廠調音標準預期用家體驗，就算唔係完全相相同，都係非常接近。
沒有留言:
發佈留言