各取所需
一路煲聽，小弟又再爬文有關Cobalt既品評，正面比負面多。正面唔使講啦，負面部份反而係值得思考。負面者主要都係質疑佢物非所值，“Hey man, you are paying more for less！”，有人係咁話唔值！對於呢個負面評價，小弟係入手之前，心裏面係有自己既睇法 ......
雖然小弟係初聽Cobalt十幾分鐘之後，就比錢捉住隻藍蜻蜓，當時佢未完全開聲，實力未完全被確定，有驚奇未有驚喜，但係小弟覺得佢係好有潛力，並非池中物，當下就咁快入手，係有些少搏一搏，考眼光既心態。
入手過咗一個星期，品聽咗Cobalt二十個鐘之後，以當前所得效果，小弟而家已經可以完全確定佢係物有所值！事實上，小弟越聽越覺得，Cobalt係小弟聽過最好“淨音質”訊源，完全唔會輸比小弟聽過既桌面系統，詳情係後文再補充。
或者有C兄會問，Cobalt分析力得24bit/96kHz，唔支援DSD，又無2.5或4.4平衡輸出，除咗支援未成氣候既MQA之外，枱面上既規格，落後同類產品成條街，咁都買得落手？！對於呢個“pay more for less”問題，小弟想用“各取所需”作為回應 ......
小弟想確定一個想法，Cobalt係流動型USB DAC市場上既定位，其實同其他產品並不類似，係別樹一格！Cobalt唔係走一般用家路線，再以佢貴人地成倍以上既索價，擺明車馬唔係玩親民！或者有C兄又會話，咪係！又中咗d大廠既市場心理策略，目標唔係平民，放土豪血！對於呢個“越貴越正”問題，小弟既回應都係果句，“各取所需” ......
作一個簡單比喻，就好似體育節目，有人鍾意睇十項全能週身刀，張張刀都有番咁上下利。有人鍾意睇單項百米飛人，衝擊速度極限。小弟選睇百米飛人，跑9秒9，不斷突破極限9秒89，9秒58 ......
藍紅之爭
係上一章小弟提到，Cobalt既市場定位係別樹一格，佢既規格小弟就唔詳講，只想概括，佢係一種對最核心性能，追求“極致優化”既設計！基於呢種設計思維，放棄咗一般市場產品功能大包圍策略，專注係絕對音質提升。Cobalt其實係一堆橙裏面既蘋果，如果要做對比，都應該與同系列姊妹產品比較，先有意義！
網上對Cobalt既評論，有唔少都係佢同紅蜻蜓之間比較，主要係性價比方面。Cobalt比紅蜻蜓索價高出20％，差價就足夠買多一隻Ztella，音質提升不明顯，所以性價比不合理咁話。對於呢個評論，小弟睇完兩者規格對比之後，完全無猶疑，肯定選Cobalt，入手前試聽，都無預要聽紅蜻蜓，只係聽咗Cobalt。
Cobalt及紅蜻蜓規格上既分別，主要係升級版DAC晶片及控制微處理器，亦加咗類似JitterBug既自家電源及數據淨化線路，再加埋其他設計上既優化，Cobalt作為佢地最新結晶產品，完全可以感受到一份精益求精，要將當前最好設計，密集壓縮放入一隻手指型USB DAC內既信念！仲加送原廠USB A去C既DragonTail轉換線。咁當然，再多既升級設計，如果反影唔到係更好既輸出效果上，就係浪費金錢同時間！
先唔好講其他，就小弟作為JitterBug既使用者及之前經驗，單係加咗JitterBug就已經可以比到聽得出既音質提升。小弟完全唔會懷疑付出額外差價而聽唔出分別，而且，當Cobalt作為前端音源DAC Pre-AMP使用時，每一點滴既音質提升，對後繼AMP及耳機最終輸出效果影響都好重要！
好明顯，Cobalt就係為小弟呢類人設計的。小弟選佢，亦唔係偶然，直頭中正大廠奸計，抵死！
沒有留言:
發佈留言