其實小弟巳偷聽過齌接STAX系统，有"燥熱"感，一陣"鞋"及"矇"味，最高裝備配套盡量可能減少樽頸位，睇下STAX系統盡情發揮可以去到咩程度。不過頭一節試聽就出咗事，原來小弟未睇清楚，就將耳機左右方向反轉咗來戴，唔怪得知聽咗不下百次既飲歌，音像定位咁唔同，仲以為靜電系統真係有咁奇異演繹效果，不過又幾得意好聽!
係最高裝備配套下正式試聽，第一個效果就係"舒服"，一切都好似預期咁斯文淡定。跟住來到第二及第三節，彈性及音樂感開始展現出來，係Young DSD平衡模式下，STAX系統亦可以有咁適度力量爆炸性表現，小弟之前驚STAX系統表現太斯文既"憂慮"，就此一掃而空。踏入第四節，效果就更係使小弟耳前一亮，STAX系統效果變化奇快，竟然使小弟聯想到煲煉LCD-3及Edition 5 Unlimited耳機時既效果! 究竟發生咩事?
一體臨場
小弟食完晚飯, 繼續品聽咗STAX系統接近2個鐘, 終於係出呢段文前十分鐘達到"一體臨場"效果! STAX系統只係開箱一個星期, 行咗大約未夠20個鐘, 就已經去到小弟既"感動"要求 ...... 以而家所得效果，小弟覺得呢套STAX系統SRM-007tll + SR-507係物有所值! 覺得自己英明神武，決擇完全正確，SR-507耳機效果更係喜出望外!
好啦，STAX系統既品聽終於來到戲肉部份，話說小弟聽到第四節，STAX系統就來料，小弟作進一步評論如下: 覺得中低頻既彈性竟然有d似LCD-3，分析力豐富層次感有d似Wonder耳機，但又無前者既暗沉，亦無後者既極端鬆散不穏現象。STAX系統最明顯特色係音節之間既細膩交接做得非常自然舒服，音形線條洽到好處毫無不足或過份造作。到咗第五同第六節，STAX系統音場得到進一步擴展，表現出多層次緃横連貫感，而且有近似HD800果種無邊際既空間，但又無HD800果份冷傲直白!
自然美麗
來到呢個階段，小弟基本上巳經掌握到Stax系統特性，幾乎係集小弟其他旗艦耳機優點(與其咁講，不如話各項效果洽到好處，無獨特偏執特性)，而且感覺係小弟聽過最線性既組合，不過線性又唔代表交行貨，平淡無味(小弟下一節再交待)。再聽咗兩節之後，就更奔放流暢，最終達到小弟既"一體臨場"感動要求，比呢個STAX系統最合適既形容詞就係洽到好處"自然"，内涵無染"美麗"!
係下一章，STAX 系統 第三章: 非平衡更譲人驚嘆! 小弟再報告Stax系統配非平衡模式連接Young DSD及Hugo效果，保證更精彩!
相關文章:
STAX 系統 第一章: 我是誰?!
STAX 系統 第二章: 初嘗驚喜!
STAX 系統 第三章: 非平衡更譲人驚嘆!
STAX 系統 第四章: 理想預期 vs 耳聽為實
STAX 系統 第五章: 鬆容奔放 vs 精密控制
STAX 系統 第六章: 華麗殿堂 天工藝術
STAX 系統 第七章: 開箱與品聽小結
沒有留言:
發佈留言