電! 磁! 靈! 第一章: 電磁感應

話説小弟收回奈米office之後，因為以網購入手既裝修工具仍未能送貨，所以螞蟻搬大屋計劃個幾月來都無咩進展，只得個等字! 除咗等，其實小弟亦入手一d心儀咗一段時間既利器，準備玩餐飽! 係玩Head-Fi以前，小弟一直係個 非常理性既業餘無線電迷，但亦發現自己同時係一個"靈感"感性人。呢幾件利器，就反映咗小弟既個性，聰明既C兄，可能巳經知佢地既功能，簡介如下:

第一件利器，基本上係所有玩無線電人士必備既所謂萬用電錶，除咗一般常見功能，小弟呢個款式就特別可以無接觸量度交流及直流電流，安全方便測驗電池補完，再生電源等，大電流電池組充電放電，及逆流器交流輸出負載情況。

第二件利器，係量度電源受電磁干擾(EMI)程度，有波幅解調獨立音頻提示，方便確定唔同干擾源。小弟除咗會用佢評估電源質量，亦可以用比較客觀既數據，測驗電池補完，再生電源，濾波器，及至其他各種電源淨化，調移及屏蔽等等抗干擾操作既實際成效，非常實用!

第三件利器，其實係一個量度電磁場(EMF)強度錶，技術功能就唔詳述了。小弟準備用佢確定電磁干擾源，然後作出可行佈局調動及合適屏蔽，盡量減少對人體及Head-Fi系統影響。

第四件利器，基本上係上一件利器既移動版，不過特別針對射頻及微波範圍，提供流動偵测及達到預設功率水平(人體可接受量安全標準)時發出警示。身處香港咁高人口及工商業密集城市，小弟帶住佢旁身，希望可以及時防避意料之外既高危電磁汚染源頭。

第五件利器，相對就無咁"實際"，主要係追蹤空間中靜態電磁量變化，包括已知既自然現象，或未知既"超自然"現象，即係常見情節中，可以用來感知追蹤所謂"靈體"既神奇儀器! 小弟想用佢確定自然及"超自然"訊源，有趣!

第六件利器，純粹係滿足小弟既"靈感"好奇，想入手好耐，直到近期先遇到合心水産品。係一對純銅製，大約長一尺L形金屬棒。雙手各握一支，話可以指示追尋失物，水源，能量源，甚至係黄金咁話! 就聽住先啦!

小弟既宗旨係能力所及，就應該盡慶咁玩，雖然呢幾件利器都係非常好玩既玩具，不過佢地既功能，同時對小弟體驗Head-Fi輸出都會有調節優化作用。咁講唔難理解，須知小弟一直追求既"一體臨場"感動效果，係要配合小弟自身作為最終受體，係整個"系統"一部份，然後可能合成終極完整效果!

小弟自身呢個受體，亦係"系統"中既一個變量，同時受到電磁靈既作用(干擾?)，同樣影響住最終生成既體驗(所謂既"腦放"?)。有咗呢幾件利器，不但可以為有形硬件系統部分提供抗干擾參數，其實亦係可以為小弟自身作為變量受體，形成一個回饋調節，進而可能得到進一步"系統"優化效果!

小弟好似越吹越遠，C兄爬文一場來到呢個位，無feel唔啱聽唔緊要，最緊要係真係體驗得到"有效"既實在變化! 利器到手之日，就係小弟以自身作為一個系統元件變量受體，被調節之時，究竟靈唔靈? 睇吓點! 肯定係有排搞，有排玩，有排講 ...... 時機成熟，整頓妥當，電! 磁! 靈! 第二章: 利器入手，再同各位C兄分享!


相關文章

電! 磁! 靈! 第一章: 電磁感應
電! 磁! 靈! 第二章: 利器入手
電! 磁! 靈! 第三章: 驚訝初試