記錄係私Blog，就好似收埋好嘢係時間囊，十年八年之後小弟自己再睇返，必定係另有一番滋味!
小弟未等私Lab裝修安頓好，就提前入手，係因為目標巳明確，同時亦係因為小弟好彩可以用比較優惠價錢購入，機不可失，就應該果斷出手!
先出住d千山萬水長征圖，之再後補開箱文及第一感!
好啦，終於到咗最緊張既開箱時刻，C兄睇一幅圖好過小弟千言萬語! 去圖!
接好電源開機後，第一件事係睇吓個顯示屏有冇死點及暗位。第二件事就係確定韌體版本，不出所料，小弟呢台係2017年11月出廠，只係V1.23，5分鐘就速速成功更新韌體到2018年4月出既最新V1.26。
重新開機後，用咗另外5分鐘左右執行咗99次示波器自我驗測，一路四圍睇部示波器，睇用家手册，一路等大約半個鐘熱身後，再執行埋個訊源通道補償。
最後接上測試棒，極速做咗功能測驗，及利用內建既1KHz方波訊源調節測試棒補償，達到最理想顯示波形。再為兩枝測試棒加上識別顔色膠圜及校定示波器日期時間，成個過程大約用咗一個鐘，示波器基本測試及調校就完成!
玩示波器小弟係新手，講到開箱及搞嘢小弟果然係老手，極速開箱無難度!
第一印象
玩咗一個幾鐘後，對佢既印象係佈局貼心，機身好膠! 好輕巧! 好精緻! 測試棒高質，手感一流! 由於無內建降溫風扇，非常寧靜，機頂只感受到對流微暖。實際操作方面流暢，整體感覺係高質產品!
小弟有兩點想提出，首先係進行第二訊道功能及測試棒補償調節操作時，小弟發現必須將第一訊道關閉，Autoset先能夠捕捉及顯示測驗1KHz方波。係操作第一訊道時，就無同樣現象，雖然第二訊道開啟咗，Autoset仍然能夠成功捕獲測驗方波。結論係第一訊道開啟時，似乎係會影響第二訊道既訊號捕捉效果，小弟唔知係咪産品既刻意設計。另一方面，小弟覺得個多功能主旋扭，加速度太高太敏銳，微調控制數字定位時有些少唔方便。
最後小弟熱切期待廠商提供下一次韌體更新，為示波器提升更多功能，特別係搜索及標記，及優化其他細節，進一步完善産品!
下文示波器 第四章: 學玩玩學，將會先進一步展述其中既取捨，對示波器既期望應用範圍，希望可以幫助小弟以更系統性及科學化方式去了解Head-Fi既品聽效果。
相關文章
示波器 第一章: 不惑慾望
示波器 第二章: 理性選擇
示波器 第三章: 終極入手
示波器 第四章: 學玩玩學
示波器 第五章: 精妙探索
沒有留言:
發佈留言