作為一個業餘無線電愛好者，係潛意識裏面，的確不排除有一定扮Pro成份。"理性"意識通常會自圓其說，比出好多"合理"理由，人性好多時就係咁樣運作! 講到底，能力所及，最緊要開心好玩，其他顧慮都係多餘!
小弟繼續講嘢，話說自從幾十年前，小弟流緊鼻涕，腦髓仲未生埋，因為好奇手痕拆開部壞咗既真空管電視機，拔出其中真空管審視佢既獨特外形及内部結構之後，就比佢吸引住，對電子無線電發生興趣。
雖然小弟成長之後無入到電子無線電相關行業，幾十年來，一直都以電子無線電作為業餘興趣，DIY小玩具。期間萬用錶都換咗不下三五七個，始終就係未曾擁有使用過，專業人士必備既工具示波器!
當年小弟巳經知道示波器既功能，好明顯，遲遲無入手，係因為小弟唔夠實力! 須知當年既示波器索價，絶對唔親民! 示波器既高昂售價，的確使小弟既理性戰勝咗慾望，未能成功扮Pro!
事實上，小弟當時亦無咁多時間， 進一步去探索更深入既電子無線電領域。就算小弟傾盡財力，勉強入手一台示波器，都係變成閒置電子玩具，大器材無確實用武之地!
雖然係咁，小弟始終念念不忘示波器，咁多年來，示波器成為小弟一直渴望擁有既玩具! 財力，時間及實際應用都需要配合，只係時機未到，應該話，就係差一個"合理"性!
好啦! 呢一章開場文交代咗小弟打算入手示波器既背景。如果C兄仲未瞓着，就追睇示波器 第二章: 理性選擇，繼續自圓其說，小弟準備點樣用部示波器? 同Head-Fi體驗，"一體臨場"感動效果又有咩關係?!
相關文章
示波器 第一章: 不惑慾望
示波器 第二章: 理性選擇
示波器 第三章: 終極入手
示波器 第四章: 學玩玩學
示波器 第五章: 精妙探索
沒有留言:
發佈留言