Sony Just ear竟然出香港版咁有誠意，即時吸引小弟眼球，話2021年4月頭開始接受訂製，價位係2W，買唔買係一件事，一定要試聽咗先！
小弟心裏面已經即時產生同Sony IER-Z1R比較念頭，特別係用金磚Sony NW-WM1Z，及鋼磚iBasso DX220 Max推動時效果異同！未聽先睇官文止渴Sony Just ear FAQ。
香港福利
試聽之前，小弟又例排來一段馬後砲，遲來的口水文。話說Just ear都出咗一段時間，以Just ear Monitor為例，大約高出Z1R價位40％(Z1R最近跌價明顯，係咪入手良機？) ，小弟大半年前機緣巧合入手Z1R，當時並未一併試聽Just ear，其實係有些少急進未盡完滿！
今次Just ear出香港版，小弟心生疑問，一定係有咩特別搞作？點可以錯過唔試聽吓？係咪一如官方介紹，Sony回饋派福利益香港燒友？Just ear售價可能反映一定事實，香港，WM1及ZX507幾個調音版本都係同價，相比另外既Monitor，Listening及Club Sound售價高出接近20％。引用一段官文，有關香港版描述如下比C兄參考：
“為香港樂迷研製的專屬調音。人聲清晰而潤澤，音場寬闊，中低頻磁性厚實且量感充足。聲音還原度和辨識度均效果出色，適合聆聽古典音樂和樂隊演奏等曲風。耳機金色面板上特別印有 “Just ear for HK”， 每對耳機更附有松尾伴大親筆簽名的記念咭一張，別具收藏價值。”
要品嚐Just ear，肉金就一定係唔少得啦！錢始終係要來賺的！耳機身有“Just ear for HK”刻印及送作者親筆簽名咭，都算係補足一下個人虛榮心！點都好，有多一款揀，總係好事！
問題！Just ear作者點解可以咁肯定香港燒友既品味？
絕對品質
Just ear係一圈一鐵混合結構，其中既13.5mm動圈單元負責低音，中高音就由另一個動鐵單元輸出，內部仲有特別獨立導管優化設計，機身背後有六個氣孔，釋放單元背波，正面有一個細小開口，將聲音傳到耳道。Just ear同Z1R比較真係不遑多樣，執着求精之作！
係出文時，小弟仍然未搵到Just ear既訊源輸入及音頻響應技術性參數，但係無阻小弟對Just ear品質既信心。就當前所知，Just ear效果係修身有線條，無咩油脂一類，適合配搭豐鬆，厚寬同有力量感既輸入，用金磚同鋼磚推應該係唔會差得去邊！
同門相爭
不過老實講，小弟入手Just ear既機會其實唔大，係當前未試聽過既情況下，完全未有入手意慾！因為已經有咗Z1R，而且感覺越聽越有，戴用幾個月之後，之前Z1R耳機體腔因為重大及耳套唔貼鬆脫情況已經大有改善！Z1R配鋼磚iBasso DX220 Max，亦係小弟聽過當前效果最好既組合！
雖然網上有評文話，Just ear同Z1R兩者互有不可取替特點，兩者兼有係無衝突既！(典型打手，時務俊傑金句？)當然前者強項係CM，貼耳隔音效果係無容置疑，聽講唔用3D印，係人工打造！仲有多種特色調音選擇。後者就係Sony Signature力作，經典獨特韻味之選！
不設預期
要使小弟入手，Just ear肯定要有大超預期既表現同驚喜，達到再一次使小弟懷疑人生既水準！因為聽過Z1R之後，條起跑線已經推前咗好多！小弟對試聽效果保持開放心態，但唔抱太大期望，主要係還之前入手Z1R時無做對比試聽既補漏！
話又要分兩頭講，世事無絕對，Z1R小弟都係因為剎時中毒入手，Just ear又可唔可以讓小弟一聽難忘，要留住佢呢？另外，唔聽過又邊有咁多聯想，咁多口水分享！買唔買反而係其次，有時間試聽經典產品，對個人品聽體驗水平提升，一定有所得益！
調音決擇
實際試聽方面，小弟會主力聽香港版及Monitor，就算聽完真係唔肯放手，極大可能都係帶隻Monitor返屋企，盡量取其均衡百搭通用效果，除非香港版效果真係魅力逼人，拍得上Z1R既Signature獨特韻味！最後結果會係點？係空手而回？Just ear Monitor？香港版？
未聽先判
雖然小弟對試聽效果無抱太大期望，係試聽之前，內心仍然有未聽先判念頭，C兄睇完先再評論合唔合理！咁要判d咩呢？當然又係老問題，性價比！值唔值！
小弟先嚐試以音頻輸出效果作為唯一標準，其他靚唔靚仔，舒唔舒服就暫時放埋一邊。 Just ear同Z1R，兩者都係Sony IEM既頂端科技產品，就先假定佢地內在單元組合既基本輸出質量相約(亦先唔好講啱唔啱口味)，咁決定勝負者，就係Just ear既獨賣CM設計！
CM設計可以進一步提升耳機最終輸出效果，已經係無容置疑！係基本輸出質量上，應該可以再提升一個大級別(可以好明顯聽得出果種)。係Just ear同Z1R對比既情況，問題就簡化成，額外付出既差價，係唔係值得從Just ear CM設計得到提升一個大級別最終輸出效果？
以Just ear Monitor為例，索價高出Z1R近40％！高出40％差價入手Just ear，期待一個大級別效果提升！對小弟來講，就係要試聽完，有再一次懷疑人生既震撼！絕對係有難度！
如果小弟咁唔好彩又中毒，Just ear可以比出咁樣程度既驚喜，咁加埋其他方面，外觀手感，特別係配戴舒適度，還可以過關，算得上係物有所值！
初試啼聲
出圖時試聽Just ear中，用鋼磚推出4.4，先聽Monitor...... 死啦，死啦，果然有料到！跟住試聽香港版...... 原來係咁！最後Monitor 聽咗30分鐘，香港版聽咗唔夠10分鐘，已經有咗結論 ...... 試聽總共唔夠1個鐘，不過得到訊息量大，亦已經達到補回漏聽Just ear目的。最終空手而回，小弟逃過一劫！
二度刺探
又過咗幾日，話說小弟之前冒住中毒既危險，首度刺探毒梟前線基地，竊得Monitor及香港版情報，發現Just ear的確係有一定毒性！好彩小弟無中劇毒，可以全身而退！雖然巳經掌控初步局勢，但係所得情報仍然未夠全面，唔可以做解毒決擇！
小弟忍唔住，最終深入虎穴，今日直搗毒梟Sony大本營，突擊刺探一次過偷埋Listening及Club Sound數據！小弟準備重新組織試聽分享，分三部份，先講整體概念感受，香港版及Club Sound一組，Monitor及Listening另一組，分成兩組作毒性報告！
耳聽為實
係分享聽感之前，要再出一段圓場文。試聽Just ear時間短暫，未能完全體會其性能，而且公模樣品機與造模機效果亦有明顯距離，再加上小弟用巳經開咗聲既Z1R做對比，其實對Just ear係唔公平！小弟既品評只能算係淺薄體驗，同時亦受限於鋼磚推動下既配對效果，仍至小弟自己個人品味偏執影響！C兄應該耳聽為實，自行試聽信自己對耳！
似曾相識
來到正式分享，小弟又要先讚吓自己英明神武，試聽咗Monitor先摸咗個大底，之後再聽香港及其他版本。前者係聽淨音質，後者係聽味道演繹！不但容易對比而且省時間！
雖然今次主要係品評音質音色，都想用些少口水講吓Just ear賣相同手感！係造形方面，金色圓面配透明機身對比強烈醒目，雖然小弟本身鍾愛Z1R一體式金屬外殼色澤重量質感，Just ear膠得來都係幾有自己形格唔覺cheap，同樣係大體腔，但輕盈得多！
試聽公模版配戴時穩定，隔音亦相當唔錯。Just ear非常明亮，比Z1R更加亮！感覺亦容易推動！雖然鋼磚出名大力，小弟一開始就用低增益輸出，都已經咁響亮，有些少超出預期。至於音色方面，小弟分兩次分別試聽咗Monitor，香港版，Listening及 Club Sound。除咗 Monitor係比較中性，其實Just ear各個版本之間，同Z1R有一種“同源”本底色彩，都係傾向暖和既一種“琥珀”色背景氛圍，所以試聽時，係有一種似曾相識感覺。
食味調音
好啦，終於到咗戲肉，先講咗Just ear香港版及 Club Sound試聽效果。話說好彩小弟係先聽咗Monitor，事先知道Just ear係有料到，完全唔會懷疑耳機質量，點解咁講？好明顯，香港版及 Club Sound調音完全係“唔夾”鋼磚！
小弟聽到既香港版效果，背景完全係比一層“厚實沉鈍”低音包圍，好似係主菜下面鋪咗一大塊“厚切豬扒”咁既聲，非常礙耳！睇來，香港版調音真係比較重口味。小弟收到風有關香港版其他聽感既評論，話佢其實係Club Sound既“更濃味”版本，特別係低音方面！
至於Club Sound，小弟試聽既感受佢都係強化咗低音部份！所不同者，香港版比較均稱，Club Sound更突出重低音線條，有d似葫蘆狀效果！兩者同Monitor對比，係兩碼子事，完全體會到調音既威力，唔知就以為係試聽緊兩隻唔同品牌耳機！
小弟感覺兩者都“唔夾”鋼磚，其實係完全可以理解！對於呢種“食味”既調音，搭配效果會非常分明，一係Like！一係就唔Like！無咩灰色位！最慘係小弟未聽到有類似Z1R既“淳厚悠盈”效果，未能好似小弟試聽Z1R咁，即時勾起小弟情慾，流哂鼻血做錯事！
另一方面Demo機感覺亦係未開聲，唔排除聽一排之後，及最終既定製成品機，效果可能更好！不過，現實係殘酷既！“唔夾”係死症！香港版同 Club Sound小弟都係聽未夠10分鐘就收場！唔使咁快就判佢死刑，好戲仲係後文，有專題章節進一步評論Just ear！C兄繼續追睇小弟口水文，保證有所得着！
直白明刻
呢一章小弟繼續分享Monitor同Listening聽感！首先，的確係名符其實，Monitor一如其名，係“技術均衡”耳機，拍得住小弟聽過既STAX靜電大耳牛效果，出聲非常平坦，完全無暗角，好似係機械式“直白”輸出，分析力要比Z1R高上至少一個大台階，鉅細無遺，明刻線條！好醜都聽得一清二楚，非常適合用作監聽(debug?! ) 。
Monitor呢種“直白明刻”特性，好似帶住人遊山玩水，專注力經常被吸引到細節，唔容易抽離感受整體氣氛！緣身山中，不見盧山！小弟個人甚至覺得有些少過度“線粒化”，有煩迫感覺，Monitor既效果唔算得係耐聽！
均稱漫美
小弟口水文列排越後越毒，C兄追小弟口水文來到呢個位，必定會有所回報唔會失望！跟住就係全文高潮，小弟會分享Listening既聽感，係小弟試聽時間最長既Just ear型號。
Listening特性如何？同Z1R相比，有咩長短？又可以說服感動小弟到咩程度？！
首先，小弟想講既係，Listening感覺上似係一個Monitor既“柔化”版，係提升咗“淳厚”味道之餘，有着非常均稱既響應效果，基本上亦係一個“直白”輸出，分析力同樣係一流，所不同者，係耐聽舒服好多既演繹！
小弟咁樣講，其實巳經係中咗毒，不過又未去到要即時毒發，亂性做錯事既程度！點解？因為Listening非常簡單，簡單到就係一份四平八穩，純粹既“均稱漫美”！用俗既講法，就係話唔夠Sexy，未盡感性！所以呢，小弟仍然可以保持理性聽住Listening。
體現係技術性方面，Z1R好明顯係氣勁及微動態方面要勝一籌(淳厚悠盈，膽味！)，背景亦要更黑，“淳”同“恬”相互交織係充滿張力既空間，音樂感及音像更有一體連貫性！唔難理解，首先係設計調音理念上既不同，Z1R係食味，Listening係守均。另一方面Z1R已開聲，Listening只係Demo機，未開聲，亦未造成模機，Listening效果未達頂峰！
雖然Listening有厚度有立體感，來得規矩均稱，好似係同一個平面主軸上既舞動，相對Z1R就係圓滑着重形體曲面塑造！你話啦，一個相對係飛機場，一個有前有後，聽邊個會流鼻血？！
當然，小弟既講法，係相對於Z1R既效果！用更形象化既比喻，如果Listening係“均稱”，咁Z1R係“圓滑”！如果Listening係“漫美”，咁Z1R就係“鮮活”！
講到進一步既意像層次，Z1R已達到小弟“一體臨場”要求，係感性均衡，同時意味住亦係技術均衡。Listening當前聽感比到小弟既，係耐聽既技術均衡效果“均稱漫美”，達到小弟標準既“欣賞”級別！
Je香港
三度刺探中 ...... 小弟今次再探Sony大本營，係抱住完全唔同既心態。首先，經過之前兩次刺探之後，對 Just ear既定位已經有咗基本確認，再探係唔會即時出意外中毒，使小弟失去理性大出血，所以完全無壓力！
既然唔會有意外驚喜，又再去試，係咩得閒無嘢做？當然唔係，其實完全係基於小弟覺得一份應有既自尊自重及敬意！係咪中咗毒自己唔知，講到咁大？小弟呢篇口水文真係仲差咗一個交待，一個對Just ear香港版(Je香港)既明確評論！
Just ear特別出香港版耳機，其實真係比足香港面，小弟身為愛國愛港既中國香港人，應該要有咁樣既一份自尊自重，用心出文，回答番Just ear作者，表示敬意！哪哪！完全無政治因素，各位C兄唔做得上綱上線，將小弟呢篇力作既口水文政治化！
好啦，又回到口水圖文，C兄睇圖就知小弟今次再探，係選咗香港版同Listening作進一步效果對比，及與Z1R異同，目的係想突出香港版特點，高潮一浪接一浪！等睇小弟之後口水文！
明麗淳厚
首先，Je香港小弟前後聽過兩次，第一次係大街鋪，第二次係Sony大本營。兩次既聽感有明顯差別，係開聲時間長短既唔同，之前被一層沉鈍低音包圍，之後已經有放鬆咗既“淳厚”味道！
小弟就用“淳厚”作為切入點，進一步評論Je香港。呢種“淳厚”味，小弟之前亦提過，係似曾相識，似乎係 Sony音色既一種代表性“琥珀”色氛圍。Je香港可以將佢想像成係Listening既“淳化”版，有着同Listening相似既底架，同樣係非常均寬既演繹。
所不同者，Je香港係整體性強化咗“淳厚”味道，Listening係相對中和既“漫美”演繹。如果用概念化既講法去形容，相對於Monitor既“直白明刻”， Listening既“均稱漫美”，咁Je香港就係“明麗淳厚”！小弟發現，佢地既效果，其實都係一脈相承！C兄如果好似小弟咁，順住聽哂Monitor，Listening及Je香港，應該會有同感！
講完Je香港同Listening既比較，有咗基底概念之後，再同Z1R對照就更精彩！小弟覺得Je香港既音色其實係最接近Z1R！唔用心就咁輕聽，仲以為係同一耳機輸出！其實兩者係有非常分別！亦係呢種決定性既分別，使小弟作出決擇！點解小弟聽Just ear無事，一聽Z1R就唔肯放手要帶返屋企 ......
高手過招
所謂高手過招，本來應該係點到即止，不過對於小弟來講，對Just ear既評論，將會係近乎苛刻，甚至係鷄蛋裏挑骨頭！小弟以Z1R及鋼磚作為日常流動組合，就知道小弟係有執着之人，對於Just ear同Z1R呢類頂端產品，唔執着唔苛刻，即係唔比面！無誠意！
無比較就無痛苦，但係同樣會係無進步! 正如前文提及，面對小弟當前呢個當打，可以使小弟舞動身體，打冷震及落淚既鋼鐵組合Sony IER-Z1R + iBass 220 Max(另文：
iBasso DX220 Max 第一章: 鋼磚傳奇)，Just ear要讓小弟懷疑人生，絕對係有難度！跟住既口水文，C兄要有心理準備，如果覺得唔啱聽，或者想聽順耳評論，就唔好浪費時間繼續追睇小弟口水文啦！
蛋裏挑骨
睇完小弟自我抽水之後，就係高潮內文。小弟先由最基本音質講起，最後先開估關鍵決定性選擇因素。
首先，Je香港比小弟既第一印象，係非常亮麗耳機，鋼磚用中度增益輸出推動Je香港既效果，比用高度增益推動下既Z1R更亮！Je香港既亮麗，係一種坦寬式既亮，來得有規矩均齊發亮。相對來講，Z1R暗位既處理就討好得多，感覺上應黑就黑，應亮就亮，應爆就爆！
事實上，Je香港既背景只能算係靜，未去到黑既程度！係音場方面，係一個均寬既矩形巨大空間，有些微前傾，空間音原有分離度，感覺雖然唔鬆散，但以粒線條為主構。相對Z1R係同心圓更有深度，有置身其中“臨場在位”感覺，Z1R相對淨密，以細膩曲面為主構。
淳厚悠盈
再上升一個層面，講返“淳厚”，Je香港雖然形色類似Z1R，但係神韻各異。小弟以“明麗淳厚”比喻 Je香港，以“淳厚悠盈”比喻Z1R，已經可以睇出其中細節。正如前文講到，Je香港係一種規矩坦寬既“淳厚”效果，俗既講法就係比較納悶既演繹，相對Z1R就充滿咗動能，比出既效果係非常活潑！
恬深淨密
非常重要既另一方面，“淳厚”係唔可能獨立呈現，必須有對比，好似同時要有陰陽先可能相生，孤陽獨陰都係死性。所以“淳厚”對應既就係“恬深”，“悠盈”對應既就係“淨密”！雖然小弟成日話Z1R有“淳厚悠盈”，只係講咗上聯，其實同時意味住，有同等分量既“恬深淨密”，係背後發揮作用，而且係相互交融！小弟想點出，Je香港係“恬深淨密”方面，相對上就係一個“蛋裏挑骨”弱項！
超動無限
上文小弟評論咗好多Je香港特性，同系型號耳機及Z1R對比，其實都唔係感動小弟既關鍵所在！Just ear成模開聲之後，小弟絕對唔會懷疑大部份上述既聽感效果，都會有唔同程度既增强! 可惜，係小弟既感性領域內，Just ear似乎無法超越Z1R！因為涉及兩者背後最根本既音頻單元設計及性能！
Z1R贏得小弟既真正關鍵：
一份“超動”量既速度，剎那生出“鮮活”；
一種“無限”級既細膩，塑造成就“感性”！
再說Z1R
用些少篇幅講吓小弟隻Z1R，係出文時巳經入手超過4個月，出聲亦肯定已經有幾百個鐘，對Z1R小弟只能話係又愛又恨！(另文：
Sony IER-Z1R 經典信使)愛者係佢獨特既音質效果，一開始好似低頻過轟，而家就係“超動”，快而悠盈，深而不沉，質而不重，“鮮活”！另一方面，鋼磚用高增益推Z1R，越聽越有，而家就係“無限”，完全體現中高頻既延展性，細膩塑造“感性”！所恨者，直到今日，Z1R有時仍然會有鬆離，唔穩唔貼耳感覺！
最終演繹
四度刺探中 ..... 又探？小弟想入手Just ear? 非也！想入手金磚？非也！完全係一份執着，係要了悟一切既執着！又再等睇小弟口水文！
小弟係試聽小結之前，再聽Je香港及 Listening，今次係配返Sony自家既金磚，試聽呢個組合，有一定義意，可以理解為Just ear選擇自我呈現既最終演繹，亦係小弟要完成對Just ear整個意像既最後一塊砌圖！而且，小弟同時對金磚亦有更明確既判斷！
試聽Just ear配金磚(高增益輸出)所得到既效果，同配鋼磚效果係一個鮮明對比，一如小弟預期，Just ear出聲既亮麗程度有所收斂，相對鋼磚推時既均亮感，金磚既演繹明暗對比比較自然，“恬深淨密”亦得到更多既體現。
雖然小弟係比較喜歡Just ear配金磚既效果，但係，想提出一個現象，無論係配金磚鋼磚，係優良淨音質輸出推動下，Just ear似乎都係有一份細微粒糙感(希望係因為未煲熟)，空間背景未夠黑淨，音像面線條未夠順滑細膩，用高增益推動時，會更明顯，咁當然，亦係相對Z1R既比較!
再說金磚
小弟想表達既意思係，呢種限制，本身會削弱聽者投入感，有分隔聽者作用，有礙聽者達到置身其中體驗。小弟期望既終極效果“一體臨場”，要求聽者主觀融入，不再只係一個獨立聽者，達到忘我境界，似乎不太可能係金磚既演繹上實現。
最後驚喜
五度刺探中 ..... 最後的驚喜到來！補上意像最後一塊砌圖頂端既缺角位！小弟五探Just ear總算係值得！但係 ...... 同時出現咗中毒危機！小弟可唔可以把持得住呢？！繼續等睇小弟口水文！
JeWM1
原來，今次小弟最後試聽既係WM1版調音(JeWM1)，專配Sony自家既金磚同黑磚。小弟話刺探既效果，係最後既驚喜，究竟驚喜到咩程度？！簡單講，如果未擁有Z1R，未聽過Z1R，小弟今次就會即時毒發！乖乖交肉金，同佢贖身，要帶JeWM1返屋企！
真係好危險！好危險！話說小弟係毫無戒心同壓力之下，希望好頭好尾，最後試聽埋JeWM1，點知差d就出事！直頭就係大驚嚇！究竟小弟聽到咩，要用驚嚇來形容？覺得JeWM1配上金磚係聽過所有Just ear既最好效果？當然唔止咁簡單！
一體臨場
如果之前Just ear既幾次試聽係好似醉酒駕駛，左右兩頭片彎成日踩線，咁JeWM1就係上左大直路，非常穩定，一路順風！小弟感受到同 JeWM1生成既效果之間係零距離！咁講係好有意味，C兄捉唔捉到小弟真正意思？
無錯！JeWM1 + 金磚，小弟聽咗幾分鐘之後，就確定係一個小弟追求既“一體臨場”效果！你話點可以唔驚喜！咁樣都未算，小弟驚喜未定之餘，之後將 JeWM1接過去鋼磚，結果？就係驚嚇！JeWM1＋鋼磚，又係一個“一體臨場”！
Just ear竟然最後先來咁樣玩嘢，試聽效果咁美好，當時小弟既心情真係好矛盾，理智巳經接近崩塌邊沿。小弟確定JeWM1係“一體臨場”，仲要打孖上，連Z1R都做唔到同時係金磚同鋼磚，達到“一體臨場”！背後就意味咗多重意義，同時亦係肯定咗Just ear既實力！
市場客觀
繼續之前，小弟要先打倒作日的我，為金磚平反。係合適匹配條件之下，金磚係可以打破框框，比出小弟要求既“一體臨場”。但係，匹配呢家嘢就唔易玩，有時甚至要撞彩！Z1R接上金磚未能好似 JeWM1 達成“一體臨場”，亦有音框現像，只能推斷Z1R同金磚唔算得上係最佳拍擋，唔似得JeWM1係針對性既調音！另一方面，亦好大機會係Z1R大食，金磚力有不及，未能完全發揮Z1R性能！
既然JeWM1巳經盡訴心中情，小弟都唔敢待慢，一於出埋個終極評論！小弟要講既係，JeWM1 + 金磚組合，係Sony要呈現出來既“客觀”市場效果，小弟一聽就覺得係一直追求既“一體臨場”，呢個現像唔係偶然！原來小弟既“一體臨場”感性均衡，並非純然主觀，係有一定客觀性！換句話說，小弟既耳感其實係有一定普遍性，唔係頑執偏聽一類，小弟要先自我賀喜一下！
既瑜何亮
小弟呢篇口水文，做戲都無咁曲折離奇，肯定成為傳奇！Just ear同Z1R係咪周瑜同朱葛亮生克關係？！
JeWM1配金磚同鋼磚同時出到“一體臨場”，意味金磚同鋼磚有一定本源特性，好難唔會勾起陰謀論聯想，邊個抄邊個之嫌？！不過小弟想提出，小弟係自己既鋼磚做咗些少音質調節(另文:
iBasso DX220 Max 第九章: 絕對音質)，C兄如果就咁將JeWM1 或 Z1R接上鋼磚，效果必定同小弟當前既組合唔會完全一樣。
既然小弟已經確定JeWM1係“一體臨場”，就說明同Z1R效果係一種“等價”關係，已經唔再有高下之分，小弟係一樣咁感動！事實上，兩者輸出既“一體臨場”意像效果，小弟都會用“鮮活感性，淳恬交融”來描劃，係感性既均衡，係淳(涵蓋厚，悠，盈)與恬(涵蓋深，淨，密)既均衡，同時亦係技術性既均衡！
魔鬼細節
JeWM1同Z1R既“一體臨場”佢地之間有咩不同？魔鬼當然係細節！係意像層面不分勝負，淳恬協調亦係無得挑剔，但仲可以執住比評個別技術特性！小弟特別想講兩者相對既強項，可以作為考慮因素。
先講JeWM1，係音色還原度，分析力，亮麗開陽感要勝一籌。Z1R係背景黑淨，密度，整體伸延度，穿透感，迅微動態，成像雕塑立體感要勝一籌。係呢個層面，小弟比較喜歡Z1R，音原多層次定位同步協調，雕塑細膩，“精凝通透”像質感，同時又可以有一體連貫音樂感！正如前文提到，呢一切都係基於Z1R擁有一種更基礎既性能“超動無限”作用！亦係贏得小弟既關鍵！
魚與熊掌
C兄或者會有疑惑，你講哂啦！又話都係“一體臨場”無分高下，而家又好似吹到Z1R贏JeWM1成條街，想點？小弟想一再強調，係意像層面的確已經達到極致，一旦離開咗“一體臨場”意像，就會產生分別心，專注力就會放咗係個別性能演繹上，自然產生次第高下分別！
咁當然，如果JeWM1成模之後，又煲鍊開埋聲，音質肯定要提升一大級！JeWM1同Z1R鹿死誰手，最後都係耳聽為實，聽過先知！又或者係魚與熊掌，各取所需！JeWM1同Z1R都唔會死錯人，完全就係個人既選擇！有無限彈藥C兄，甚至可以係兩者兼得！
事實上，以小弟當前對JeWM1所得聲感，好難想像擁有金磚同鋼磚C兄玩家，唔去試聽JeWM1配搭效果！啱唔啱聽唔係最重要！入唔入手更加要小心三思！但係，唔知無聽或者知道唔聽，就必定係錯過損失！
試聽小結
最後既小結，小弟用別開生面方式，嘗試回答幾個問題總括感想。
1. 咁JeWM1即係最好既Just ear耳機啦？
首先，沒有最好，係只有更好！當前小弟已擁有鋼磚系統，JeWM1所得既效果就係最合口味，如果小弟而家一定要選，當然就係JeWM1!！完全係一個夾唔夾問題！
小弟一開始都係一廂情願，將焦點放係 Monitor，之後又覺得Listening比較舒服，最終五次刺探，再三比較埋Je香港及JeWM1，先有結論！再一次說明，人地點Sell點講唔重要，自己點想亦唔真確，只有耳聽為實先係王道！
2. 從頭再選，Just ear還是Z1R？
要睇因緣場景，正如前文提到，如果兩款耳機都未聽過放係小弟面前，用金磚推，小弟好大機會就會選咗JeWM1，因為即時效果就係“一體臨場”！另一方面，Z1R唔係針對配金磚調音，又需要一段時間開聲，相對即時效果就無咩優勢！仲有，以Z1R個副體形體重，亦唔係所有人戴得起佢！一上耳試戴，就可能已經打消入手念頭！
3. 有無意向入手Just ear？
未有意向入手，最直接原因係，小弟未有無限彈藥！二來Z1R仍然係小弟聽過最滿意既效果！三來JeWM1同 Z1R比出既食味相似，都係一陣Sony獨家音染！小弟暫時無意同時擁有兩款近味耳機。
4. Just ear值唔值？
最難回答問題！因為比較相對同主觀，小弟只能用自己既角度提出感想。如果小弟今日要入手Just ear，必定就係JeWM1，價位係2W，同Je香港相同，比其他Monitor，Listening及Club Sound版要高出20％，比 Z1R當前價位(1W)，更係要高出近一倍！
換句話講，即係一對JeWM1可以換兩對Z1R！即使JeWM1已經被小弟認定可以達到“一體臨場”終極效果，2W呢個價位，如果用Z1R性價作對比，明顯係偏貴！
小弟有一個期望，Sony如果有誠意，可以做一期優惠派福利益香港人，將JeWM1及Je香港價位調到同其他型號一致，大約係1.7W！小弟認為係比較合理，物有所值！功德無量！
