自2020年12月中入手iBasso DX220 Max鋼磚以來，成日掛住煲聽，無咩特別留意市場新消息，今日先知道原來聖誕期間，已經宣佈有新旗艦iBasso DX300將係2021年頭出世！
小弟突然覺得好似晴天霹靂，鋼磚入手未夠一個月，就出新旗艦，少咗一個選擇！嗱嗱臨睇咗DX300指標，即刻鬆咗一口氣！雖然佢承繼咗鋼磚一部份優良設計，但係定位唔同！好明顯，鋼磚自成一檔，目標係發燒玩家，DX300目標係比較大衆化用家。如果小弟再揀，豪不猶豫，不二之選都係鋼磚！
DX300擺明係DX220既進化版，唔係鋼磚既升級版，所以要作出選擇完全無難度！有執着者入鋼磚，想玩新嘢入DX300(有咩新嘢C兄自己索料)，銀両有限制入DX220，清清楚楚！咁當然，都要過埋耳聽為實最後一關，先可以落搭比DX300！
引官方一段開場文睇住先，之後出咗新機，試聽完再分享感想。不過小弟有預感，DX300會係真正既市場殺手！
預期比較
雖然話DX300既定位走返主流路線，鋼磚走極致偏峰，試聽之前小弟純粹吹水做一個相對鋼磚預期比較。 首先係優化方向，大幅提升返流動性，小弟覺得新設計其實幾型有貴味，流曲線大屏幕十足一部手機，電平器外露放機身右邊，好明顯係想兼顧單手操作既用家體驗！小弟自己就最鍾意沿用可換AMP模組設計，如果鋼磚都可以換AMP就非常完美！
最重要係音色音質方面，雖然電源方面作出些少妥協，但可以做到比較薄輕身栽。自研FPGA-Master技術， 選用CS DAC晶片，睇得出提升主動控制，相對鋼磚既“大氣”，應該係走返多些少“密實”風格！
DX300同鋼磚效果對比，有冇得揮？小弟覺得基本上會係各有特色，味道之選！比你做呀，最優市場策略一定就係咁玩！特別做到定位唔同，各有長短，有米玩家分分鐘又入鋼磚，又入埋DX300，荷包出大血，中正大廠奸計！
但係，售價絕對係一個重要指標，DX300定位剛好係萬元級別，比鋼磚價位低40%，鋼磚用5塊電池直出高壓無做升壓，靚料電容及模擬電平器，實實在在全部都係成本！
唔好不設實際預期DX300絕對音質可以超越鋼磚，應該比同級DAP有過之無不及！當然，DX300主打係行返流動性，選得佢，就唔會考慮鋼磚既可携座枱！
待續 ......
